Nuummiut qanermut assuaqutip atorunnaarnera pillugu: Peerlugu pitsaaqaaq

Niuerniarnermi immaqaluunniit bussinut ilaaniaraanni unnuaqeqqarmat qanermut assiaquteqartariaaruppugut. Tamannalu pillugu Nuummi innuttaasut isumaat KNR-imit tusarniaavigaagut.

Allattoq Marie Kûitse Kristensen, Signe Haahr Pedersen

februaarip 11-at 2022 06:14

Nuuk centerimi ullumi inuit qungujulasorpassuit takussaapput.

Pisortat suliffeqarfiini tamani qanermut assiaquteqarnissaq siorna novembarip ulluisa 13-iannit atuutereerluni unnuaqeqqarmat atuukkunnaarpoq.

- Pitsaaqaaq, kisianni siullermik ippinnalaaqqaarpoq sivisuumik atornikuullugu. Kisianni pitsaaqaaq. Ullormut akunnerit arfineq pingasut atortaraluaratsigit qasunarsilaarami, kisianni peerlugu pitsaaqaaq, 21-nik ukiulik, Bastian H. Rosing taama oqarpoq.

Taanna Nuuk Centerimi atisaarniarfimmi Nønnemi ulluinnarni pisiniartitsisarpoq.

AAMMA ATUARUK Killilersuutit atorunnaartut: Qanermut assiaqut unnuap-qeqqanit atorunnaassaaq

Inuppassuillu ullormut isaasartut qanermut assiaquteqassaarnerat ernumanartoqartinngilaa:

- Isumaqaannarpunga inuit uagut namminneq akisussaaffigigipput uagut nammineq qanoq illersiorniarnerluta, taava uanga soqarnanga ajorinngilara, allat qanermut assiaquteqarniarunik assiaquteqassapput.

Sissi Kreutzmann, Ittu.nettimi sulisarpoq, sulilu mianersorusuppoq. Assi: KNR

Inoqarporli suli coronap tuniluunneranik mianersortunik, Sissi Kreutzmann, aperaara sooq suli qanermut assiaquteqarnersoq?

- Tassa una pissutigiinnarpara, imminut illersorallarusukkama massakkut ilaa suna tamaat ataatsikkorsuaq, aamma qanermut assiaqutit atorunnaarrappaat. Uanga eqqarsarama eqqissiimippata aatsaat peerniarlugu.

Benigne Bernhardsen Foto: KNR

Benigne Bernhardsen, ullaaq busserniarluni qanermut assiaquteqannginnami ippigusulaarpoq:

- Ajunngilaq, kisianni suli sissuernarpoq. Mianersornarpoq suli aamma tuniluunneq ingerlaarnermut.

- Ilorraallannassaqaaq. Soorlu inuit ataatsimoorsinnaalerneri, killilersorneqarunnaartut.

Illit massakkut qanermut assiaquteqarnat caferputit, qanoq ippa?

00:02:19

- Ajunngilaq, eqqumiippoq aamma ullaaq bussinut ikilerluni qanermut assiaquteqarnani, kisianni akunnappoq.

Tunumi killilersuutit sapaatit akunnerata siulianili atorunaarput, nunattalu sinnerani coronamut akiuussusertissimanermut uppernarsaammik takutitsisariaarulluni. Maannali nunarput tamakkerlugu killilersuisoqarunnaarpoq.

Peqqinnissaqarfinni qanermut assiaqutit suli piumasaqaataapput.

Nutaarsiassami kukkunermik nassaarsimaguit uunga allaffigineqarsinnaavugut.