Nuup Kangerluani ajunaarneq: Unnerluussisussaatitaasoq ukiuni marlunni pineqaatisseerusuttoq
Angutit marluk Nuup Kangerluani umiatsiamik ajutoornermut atatillugu politiinit pasineqartut ullumi eqqartuussivimmiipput.
Angutit marluk 2020-mi juulip ulluisa 19-ianni nalunaaqutaq 01.45-p missaani umiatsiaaqqamik sukkasuuliamik 50 knobip missaanik sukkassuseqarlutik sikumut apornerminni inatsisinik arlalinnik unioqqutitsisimasutut pasineqarput.
AAMMA ATUARUK Umiatsiaq Nuup Kangerluani ajutoormat arnaq inuusuttoq ajunaartoq
Ajutoornerup kingunerisaanik arnaq inuusuttoq toquvoq, ilaasullu sinneri arfinillit napparsimmavimmut unitsinneqarlutik.
Unnerluussisussaatitaasup angutip umiatsiaaqqamik ingerlatsisup ukiuni marlunni pineqaatissinneqarsimasunut inissiisarfimmiittussanngortinneqarnissaa piumasaraat.
Taanna mianersuaalliornermi toqutsisutut kiisalu timimut innarliisutut ilaatigut unnerluutigineqarpoq, aamma ingerlatsissagaanni imigassartorsimanerup annerpaamik 0,5 promillemiinnissaata killinganik qaangiilluni 1,07 promillemik aalakoornartortalimmik imigassartorsimasutut unnerluutigineqarluni.
Angutip aappaa suliami unnerluutigineqartoq imaani angallannermi sillimaniarnermik unioqqutitsisimasutut kiisalu 1,37 promillemik imigassartorsimasutut ilaatigut unnerluutigineqarpoq.
Unnerluussissut naapertorlugu taassuma ukiup affaani pineqaatissinneqarsimasunut inissiisarfimmiittussanngortinneqarnissaa unnerluussisussaatitaasut piumasaraat.
Unnerluutigineqartut nassuerutiginnittut, umiatsiamili ajutoornermuunngitsoq
Eqqartuussivimmi suliaq ullunik pingasunik sivisussuseqassaaq.
Unnerluussissummi umiatsiamik ajutoornermi pissutsit arlallit pineqarput.
Nakuusersernermik pasilliuteqarnerit, biilersinnaanermut allagartaqarani ingerlatsineq unioqqutitsisumillu umimmammik pisaqarnerit pillugit pasinninnerit ilaatigut unnerluutigineqarput.
AAMMA ATUARUK Ajutoornermi ajunaartoqarnera: Angutit inuusuttut aalakoornartutorpallaarsimallutik umiatsiarsimapput
Angutip aappaata eqqartuussissuserisuata Finn Meinelip sullitami pissutsini arlalinni umiatsiamik ajutoornermut tunngassuteqartuni pisuunnginnerarfigigai unnerluutigineqartulli ilai allat nassuerutigigai oqaatigaa.
- Sullitara umiatsiamik ajutoortoqarnerani ingerlatsisimasutut pasineqanngilaq. Taassuma imaani sillimaniarnermi annanniutinut tunngasut pinngitsuunerarfigai, Finn Meinel oqarpoq, nangillunilu:
- Unioqqutitsisumilli umimmanniarneq nassuerutigaa.
Eqqartuussissuserisup, Ulrik Blidorfip angut umiatsiamik ingerlatsisoq sullitaraa, taassumalu sullitami unnerluussut qanoq oqaaseqarfigineraa KNR-imut paasissutissiissutiginianngilaa.
Taassuma sullitaa mianersuaalliorluni toqutsisimasutut pisuutinneqassaguni ukiuni marlunni pineqaatissinneqarsimasunut inissiisarfimmiittussanngortinneqarsinnaavoq.
Eqqartuussivimmi suliaq marsip ulluisa 16-ianni aalajangiiffigineqassaaq.
