Nuussuarmi tunillanneqarsimasoq ataaseq paasineqartoq

Naak Upernavimmi coronavirusimik tuniluuttoqaralurtoq Upernaviup nunaqarfiini tunillatsissimasumik maannamut nassaartoqarnikuunngilaq. 

Nuussuarmili tunillatsissimasoq ataaseq nassaarineqartoq Naalakkersuisut ippassaq unnukkut paasissutissiipput.

Inuk tunillatsissimasoq angalasuunngimmat allaniillu tunillatsisimasinnaanani Nuussuarmi tunillatsissimassasoq Naalakkersuisut naliliipput. 

- Najukkami tunillatsissimasunik ujartuineq unnummut taamaattumik aallartinneqarpoq, qanillisimasallu kinaassusersineqartarneri malillugit ilisimatinneqartassapput, Naalakkersuisut Facebookikkut allapput. 

Ersiutit soorlu quersornerit, kissarneqarnerit, mamassutsinik malussarsinnaanerit imaluunniit naamasinnaanerit annikillineri oqartussaasut aammaarlutik innuttaasunut eqqumaffigeqqullugit kaammattuutigaat.

Ersiuteqarnermi angerlarsimaannartoqassaaq najukkamilu peqqinnissaqarfik imaluunniit corona hotline 801100-imut ataasinngornermiit tallimanngornermut nal. 8-16-imut ammasartoq attaveqarfigineqassapput.

Nunaqarfinni assigiinngitsuni misissuinissamut pisariaqartitsinermik nalunaarsuisoqassaaq suliniutissallu pitsaanerpaamik aallunneqarsinnaassapput siunnerfilersorneqarlutillu, Naalakkersuisut allapput. 

Oqartussaasut innersuussutaat:

Napparsimaguit angerlarsimaannarit.

Errortukulagit assannullu spritsimik atuisarit.

Tallinnut quersortarit tangajortarillu.

Allanik atuinissat killilersoruk – assammiinnerit, ersakkut kunissinerit, eqitaarinerit il.il. pinaveersaakkit.