Navalnyjip tapersersortai 100-nit ikinnerunngitsut tigusaasut

Ruslandip præsidentia, Vladimir Putin, nunat killiini Navalnyjimut tapersersuisunut mianersoqqusivoq, ajorsitsaarinerillu suugaluarpata Ruslandimi naalakkersuisunit sakkortuumik qisuariarfigineqarumaartut oqaatigalugu.

Allattoq Ritzau

apriilip 21-at 2021 14:16

Nutserisoq Mads Lynge, Naja-Vivi Mikaelsen

Ruslandimi illuatungiliuttut siuttuat, Aleksej Navalnyj, tapersersorniarlugu Ruslandimi illoqarfinni assigiinngitsuni ullumi pingasunngornermi ingerlaaqatigiittoqarmat inuit 100-nit ikinnerunngitsut politiinit tigusaapput.

Innuttaasut sinnerlugit suliniaqatigiiffiup OVD-Infop kisitsisaataasa tamanna takutippaat. Ruslandip præsidentiata Vladimir Putinip nunat killiit saassullugit oqalugiarnerata nalaani taama pisoqarpoq.

Navalnyjip tapersersortaannut tamanna mianersoqqussutitut aamma isigineqarpoq.

AAMMA ATUARUK Navalnyj Ruslandimi parnaarussivimmi peqqiinneruleriartortoq

Ajorsitsaarinerit suugaluarpata Ruslandimi naalakkersuisunit sakkortuumik qisuariarfigineqarumaartut, Putinip oqalugiarnermini oqaatigaa.

Navalnyj Moskvamit kangimut 100 kilometerinik ungasitsigisumi maanna parnaarussaaqqavoq, nakorsaasalu oqaatigaat sanngiilliartuinnartoq, Navalnyjimi parnaarussivimmi pissutsit akerliuffiginiarlugit neriumajunnaaqqammat.

Navalnyj parnaarussiviup napparsimmavittaanut ullumi pingasunngornermi nuunneqarpoq.

Nutaarsiassami kukkunermik nassaarsimaguit uunga allaffigineqarsinnaavugut.