Somaliami meeqqat hunnorujulikkaat angerlarsimaffiit nerisaqarfiusut ilaanni toqusut

Somaliami meeqqat hunnorujulikkaat meeqqat angerlarsimaffiisa nerisaqarfiusut ilaanni qaammatit arfinillit ingerlaneranni toqusimapput.

Naalagaaffiit Peqatigiit meeqqat pillugit suleqatigiiffiat Unicef ippassaq marlunngornermi taama ilisimatitsivoq.

Meeqqat kaannersuaqarneranik eqqorneqartut nappatinilluunniit assigiinngitsunik, soorlu mæslinginik, koleramik malariamilluunniit eqqorneqartut, nerisaqarfigiitigalugu angerlarsimaffinniittut pineqarput.

Somaliami qaammatini tulliuttuni kaannersuaqarsinnaanissaa Naalagaaffiit Peqatigiit ataasinngornermi aarlerisaarutigereeraallu, ippassaq marlunngornermi taama ilisimatitsisoqarpoq.

AAMMA ATUARUK Naalagaaffiit Peqatigiit Somaliami kaannersuaqarnera aarlerisaarutigigaat

Inuit kaannersuaqarneranik eqqorneqarsimasut meeqqatik ersukkiullugit ilaatigut ungasissorsuarmut pisuinnarlutik panernersuaqarneranit islamisiortullu al-Shabaabimeersut saassussisarnerinit qimaasut takussaasut, Somaliami nunap immikkoortuisa ilaanni atorfilittat ilaata oqaatigaa meeqqanillu toqusoqartartoq nalunaarutigalugu.

Afrikap kangisissortaani ukiut tallimassaat iluamik siallerfiunngilaq.

- Meeqqat 730-t missaat angerlarsimaffinni assigiinngitsuni ukioq manna januaarip juulillu akornanni toqusimapput, amerlanerorataannaallutillu. Toqusummi ilaat nalunaarsorneqarneq ajorput, Unicefip Somaliami sinniisua Wafaa Saeed tusagassiortunut Genévemi katersortitsinermi oqarpoq.

Somaliap ilaani ukioq manna oktobarimit decembarimut kaannersuaqarnissaa ilimagineqartoq, Naalagafffiit Peqatigiit oqaatigaat, panernersuaqarnerata ajornerulernissaa ilimagineqarmat, soorlu aamma nerisassat inuussutissat nunani tamalaani akitsoriartuinnartut.