Palle Jeremiassen qatserinermut atortut amigarnerat pillugu: Tamanna ajorluinnarpoq

- Tamanna ajorluinnarpoq. Soorunalimi kommunimi nunaqarfiit tamarmik qatserinermut atortunik peqartussaapput tamannalu iluarsineqassaaq, Avannaata Kommuniani borgmesteri, Palle Jerimiassen tusagassiuutinut nalunaarummi oqarpoq.

Nutaarmiuni illumik februaarip qulingani ikuallattoqarnerata angutillu 45-nik ukiullip ajunaarnerata kingunerisaanik Palle Jeremiassen taama oqaaseqarpoq.

Pisup kingornatigut nunaqarfimmi qatserinermut atortorissaaruteqaranilu qatserisartoqanngitsoq taamaammallu innuttaasut ikuallattumik isiginnaaginnarsinnaasimasut saqqummiunneqarpoq.

- Angutip ilaqutaanut qanigisaanullu misiginneqataangaarpugut. Aammali nunaqarfiup innuttaanut misigisaq alianartuuvoq, borgmester Palle Jerimiassen oqarpoq.

Nutaarmiut Avannaata Kommuniata nunaqarfiini qatserinermut atortunik tamakkiisumik atortoqanngitsut ilagigaat, tusagassiuutinut nalunaarummi allassimavoq. Nunaqarfiup qanittumiittup qatserinermut atortorissaarutini sillimmataasut piffissami atortinniarlugu neqeroorutigaa.

Nammineq kajumissutsiminnik qatserisartussarsiortut

Avannaata Kommuniani Upalungaarsimasut pisortaata, Isak Pjetturssonip avannaani ilaatigut aalisartoqarfiummat qatserisartussarsiorneq ajornakusoortoq KNR-imut oqaatigaa.

Palle Jeremiassenip qatserisartunik, pingaartumik kommuni allanitulli nammineq kajumissutsiminnik qatserisartunik pissarsiniarneq ajornakusoortoq uppernarsarpaa.

- Maannakkorpiaq nunaqarfimmi aqutsisuni ilaasortanut pikkorissaaneq aallarteru3orpoq. Pikkorissarnermi aamma sillimaniarneq eqqartorneqartussaavoq qanorlu pitsaanerpaamik aaqqiinissaq nunaqarfiit ataasiakkaat iluanni eqqartorneqassalluni, Palle Jerimiassen oqarpoq.

Nutaarmiuni ajunaarfiusumik ikuallattoqarnerata kingorna angutit marluk nammineq kajumissutsiminnik qatserisartunngorniarlutik nalunarasimapput. Tamannalu borgmesterip ilorrisimaarutigilluinnarpaa.

Kommunip illoqarfiini sisamani nunaqarfiinilu 21-ni nammineq kajumissutsiminnik qatserisartut 200-t missaanniipput. Kommunip upalungaarsimanermut immikkoortortaqarfia ukiup affakkaarlugit nammineq kajumissutsiminnik qatserisartunut tunngaviusumik pikkorissaasarpoq. Tulliani 2023-mi apriili/maajimi pikkorissaasoqassaaq.

Nammineq kajumissutsimik qatserisartunngorusukkaanni illoqarfinni qatserisarfik attavigineqarsinnaavoq.

Inatsisitigut innersuussutit naapertorlugit nunaqarfinni minnerusuni qatserisartut ikinnerpaamik pingasuussapput, ‘qamitsiniarnermullu atortorissaaruteqassalluni’. Qamitsiniarnermut atortorissaarut assersuutigalugu tassaavoq UTV imaluunniit ATV qamitsiniarnermut seqqartaatinik imaluunniit qatserutertalik.