Pape parteeqatiminit isornartorsiorneqalersoq: Taarserneqarli
Danmarkimi konservatiivit siulittaasuat Søren Pape Poulsen konservatiivit siulittaasuattut piukkunnanngitsoq konservatiivini politikerit arlaqartut taama isumaqarput.
Københavnemi borgmesteriusimasoq Mogens Lønborg taakkununnga ilaavoq.
- Qinersisartut pingasuugaangata marluk aatsaat taama piffissap sivikitsumik ingerlanerani annaaneqarpata qineqqusaartoqarneranilu kukkussuterpassuarnik ajortunik kinguneqartitsisoqarpat, tulluartumik siulittaasoqarnersugut nalilersuisoqartariaqarpoq, Mogens Lønborg oqarpoq.
Inuttut atugarisani pillugit kukkusumik iliorsimanera takuneqarsinnaavoq Søren Pape Poulsenip konservatiivit ilaasortaanut mailikkut nassiussaani nassuerutigaa.
Aviisip Politikenip pissarsiarisimasaani tamanna takuneqarsinnaavoq.
Folketingimut novembarip aallaqqaataani qinersisoqarmat Konservatiivit 2019-imi Folketingimut qinersinermut sanilliullugit 1,1 procent pointinik kinguariarput.
Qinersisut 5,5 procentiinit qinerneqarput, folketingimilu ilaasortaatitaat marlunnik ikinnerulerlutik.
Qinersisartut aggustip ulluisa 21-anni isumasiorneqarneranni Voxmeterimit suliarineqartumi Konservatiivit qinersisartut 16,5 procentiinit qinerneqarnissaat siulittuutigineqarpoq.
Tamanna pivoq Søren Pape Poulsen ministeriunertut qinigassanngortilluni nalunaarneranit ullut arfinillit qaangiummata.
Taamanili Søren Pape Poulsenip politikeritut tusaamanerlugaatigilikkaminik oqaluttuartoqallattaalerpoq, ilaatigut inuttut atugarisai pillugit oqaluttuat eqqunngitsut saqqummiunneqaqqattaalerlutik.
