Partiit Søren Pape Poulsen akuersaanngilluinnaraat
Danmarkimi Konservativeneersup ministeriuninngorusuttullu, Søren Pape Poulsenip, Kalaallit Nunaat nunatut siuarsagassatut taallugu Afrika sermilittut taasimallugu sapaatit akunnerisa siulianni nassuerutigaa. Taassumali taama oqarsimanini uggorinngilaa.
Taannali TV-kkut TV 2-mit sapaammi apeqqarissaarfigineqaramik taama oqarsimanerminut utoqqatserpoq.
Oqallisigisaq naatsumik
Nunarput Afrika sermilittut siornatigut ilumut taasimaneraa, Aaja Chemnitzip (IA) Søren Pape Folketingimi ammaanersiornermi sisamanngornermi oqalinnermi aperaa.
De Konservativeneersoq, Søren Pape, ministerinngorniuttunut ilaavoq.
Taama oqarsimanerluni eqqaamanngikkini, Søren Pape akivoq. Taamalli oqarsimalluni eqqaasimanerariataarpaa.
Taama oqarsimanini ajuusaarutigalugu, Ekstra Bladetimut oqarpoq. Nunarpulli nunallu siuarsarniakkat arlalitsigut assigeequteqarnerannik isummani aalajangiusimallugu aamma oqaatigaa.
Aaja Chemnitz tamanna pillugu KNR-imut ima oqarpoq: - Danmarkip nunattalu atassuteqaqatigiinnerannik taakkulumi inuinut avooqqaarinerulluinnarpoq. Taamaammat Konservatiivit Søren Papelu ministeriuninngussappat ministeriunertut suleqatigisinnaanissaat takorlooruminaatsippara.
Taassuma parteeqataa, tassa IA-p siulittaasua Múte B. Egede KNR-imut ima tapersiivoq:
- Inunnik qanoq isiginneriaaseqarnerluni nunarpullu pillugu isummani qanorlu isiginneriaaseqarnerluni, Søren Pape Poulsenip taama oqarnermini ersersippaa. Nunatsinnik, inuinik inuiannillu allanik qanoq ataqqinninngitsinerluni uatsinniit pitsaanerusutut imminut inissilluni taama oqarnermini ersersippaa. Pape ministeriuninngussappat Danmarkip nunattalu naammassisaqarfiulluartartumik suleqatigiilluarnerat qularnanngitsumik killeqartorujussuulissaaq.
- Kipparippallaamik oqarnikuugama Kalaallit Nunaannut kalaallinullu utoqqatserpunga. Taamak oqarsimasussaanngikkaluarpunga, Konservativit siulittaasuat, Søren Pape Poulsen sapaammi oqarpoq.
Siumup siulittaasuata Danmarkimi ministeriunissatut piukkuttup assersuussinera nuannarinngeqaa.
- Qaffasittumut inissinnissamut siunertaqartup inuiannut kalaallinut taamannak isiginneriaaseqarnera ataqqinninngitsutut akuersaarneqarsinnaanngitsutullu isumaqarfigaarput, Erik Jensen oqarpoq.
Demokraatit: Kalaallit kisimik pineqanngillat
Taanna akuersinngitsuni kisimeeqqajanngilaq. Demokraatit taama oqarsimaneq kalaallinuunnaanngitsoq tunngasuusutut nalilerpaat.
- Akuersaarneqarsinnaanngilaq. Isumaqarpunga takutitsisoq inunnut isiginneriaatsimik peqqinnanngittumik, kalaallinuunnaanngittoq kisianni aamma afrikamiunut, Jens-Frederik Nielsen oqarpoq.
Naalagaaffeqatiginnermik illersuisut: Akuersaanngilarput
Nunatta Danmarkimut atalluni naalagaaffeqatigiinnut ilaanissaanut illersuisut, Atassutikkut, nunatta Afrikamut assersuunneqarnera ataqqinninnginnertut isigaat.
- Inuiaat allat ataqqisussaavagut, Søren Papellu taanna aamma puigorsimarpasippaa. Inuiaat allat ataqqisussaallugit nikanginerusutut taamatut inississimallugit, taannalu uagut Atassummiit akuersaanngilluinnarparput, Aqqalu Jerimiassen oqarpoq.
Tassalu Siumup, Demokraatit Atassutillu Danmarkimi ministeriuninngorusuttup Afrikamut Kalaallit Nunaannik sanilliussinera nuannarinngeqaat. Utoqqatserneralu aamma tamarmik tutsuiginartinngilaat.
Siumut ministeriuninngoratarsinnaasumut nuannarinnileqqissappat Søren Pape Poulsenip aana suliassaa:
- Inoqatiminut qanoq isiginneriaaseqarnerminik allannguerujussuartariaqarnissaa, Erik Jensen oqarpoq.
Taakkua Folketingemeeqqilissagunik Søren Pape Poulsen ministeriunissatut toqqarnianngilaat.
Demokraatit nassuiaaqqusisut
Demokraatit Søren Pape Poulsen ministeriuninngussagaluarpat Kalaallit Nunaanniit suleqateqartariaqarnera pingaartippaat. Tamannali pissappat, nuannarinnileqqissagunillu ministerinngoratarsinnaasoq Kalaallit Nunaanni najugalinnut nassuiaassasoq kissaatigaat.
- Itisilertariaqarpaa Konservativit partiitut isiginneriaasaat Kalaallit Nunaannut qanoq innersoq, Jens-Frederik Nielsen oqarpoq.
Naalagaaffeqatigiinnermik illersuisut, Danmarkimi partiip suleqatimik Venstrep siulittaasua, Jakob Ellemann-Jensen, ministeriunissatut piukkuppaat.
Konservatiivillu siulittaasuata utoqqatsernera tusaatissatut tiguaat.
- Kisianni naluara upperivinneqarsinnaanersoq, Aqqalu Jerimiassen oqarpoq.
Naalakkersuisut pakatsisut
Søren Pape Poulsen Danmarkimi ministeriuninngussagaluarpat Naalakkersuisunik suleqateqarneq ajornakusuussaqisoq, Naalakkersuisut siulittaasuat, siusinnerusukkut oqarpoq.
- Oqaaseqartup oqariartuuteqartullu, ( Søren Pape Poulsen-ip), inunnik nunatsinnullu qanoq isiginninnini ersersikkaa isumaqarpunga. Ataqqinninnginnermik, nunatsinnut, nunatsinnilu innuttaasunut ersersitsivoq, taamatullu inuiannut allanut. Nammineq pitsaanertut inissillunilusooq taamatut oqariartuuteqarpat, Múte B. Egede oqarpoq.
