Pave Benedikt ilisaannginnermini ullut pingasut toqusut inaaniittoq
Paaviusimasoq Benediktit 16-at ukiortaami 95-nik ukioqarluni toqusup assingi arlaqartut Vatikanemi sapaammi pisortatigoortumik saqqummiunneqarput.
Paviusimasoq taanna tyskiusoq Vatikami toqusut inaanniippoq aappaluttunik atisaqarluni biskoppillu naasaanik qaqortumik gudlimilu nasaqarluni.
Paaviusimasoq jannuaarip ulluisa tallimaani ilisaappat maanna paviusumit Pave Fransimit ilineqassaaq.
Paaviusimasup Benediktip nammineq kissaateqarnera malillugu persuarsiornartumik nalinginnaasumillu ilisaassaaq.
Benedikt 2005-mi paavinngortinneqaqarpoq, Johannes Paul aappaata toqunerata kingorna.
Benedikt ukiut arfineq pingasut pavetut atorfeqareerluni februaarip qaammatani 2013-imi peqqippallaarunnaarnini pillugu pavetut tunuarpoq tamannalu immikkut illuinnartuuvoq, tassami paviusartut toqussi tikillugit paviusaramik.
Kingullermik paavitut tunuartoqarpoq ukiut 600-it matuma siorna, taamaattumik paaviusimasup ilisaanerani maanna paaviusoq najuuttussaammat immmikkut illuinartuuvoq.
Benedikt 2013-mi pavitut tunuarnermi kingorna Vatikanemi mattuttut inaanni najugaqarpoq .
Pave Benedikt Tysklandimi inunngorpoq ateqarluni Joseph Ratzinger.
Benedikt paaviunermini qanganisarsiortutut ilisimaneqarpoq, siulerisaminullu pave Johannes Paul appaanit nuannarineqarluartumut sanilliulluni tunuarsimaarneuvoq nuimaniartuunanilu.
Benediktip paaviunerata nalaani mamianartuliat arlaqartut saqqummiunneqarput, tassalu ilagiinni katuullini palasit meeqqanik kinguaassiuutitigut atornerluisarnerat saqqummiunneqarmata.
