Pave Francis, paveni siullersaalluni Nunavummut utoqqatseriartorpoq
Pave Francisip Canadamiinnermini Canadap kitaaniit kangiani Nunavummi Iqaluit ilanngullugit tikeraarfigai, taamaalillunilu Pavep Paveni siullersaalluni Nunavut tikippaa.
Pavep Canadami nunap inoqqaavi tikillugit utoqqatseriartornera utoqqatserfigineqartunit assigiinngitsunik isummerfigineqarpoq, Paveli Iqalunnut tikikkami inuppassuarnit tikilluaqquneqareerluni akunnerni pingasuinnarni tassaniittussaagaluarluni akunnerni arfinilinni tassaniippoq.
Inuit 100-t missaanniittut immikkut naapippai
Pavep Iqalunniinnermini inuit 100-t missaat katuullit angerlarsimaffiutigalugit atuarfiini tusaamanerlugaasuni atuartitaasimasut immikkut naapippai. Pavep taakkua oqalugiarfigigamigit oqarpoq ajortorujussuarmik pineqarsimanerat nammineq isiminik ammaasimasoq.
Inuit kulturimik atujuarnera takutinniarlugu aalajangersimapput kulturimik, ilagiinnit kristimiunit naqisimaneqarniarsimagaluartup qanoq nukittutiginera Pavemut takussallugu, taamaammallu Pave torlussorfigineqarlunilu qilaatersorfigineqarpoq.
Qilaatini Pavemut tunissutigaa
Piita Irnip, Nunavummi kommissæriusimasup Inuit nukittuujunerat Pavemut takutinniarlugu qilaatersorfigeriarlugu qilaatini inuit pillugit eqqaassutigisartagassaatut Pavemut tunissutigaa.
Pave Fracis Iqalunni oqalugiarluni oqarpoq katuullit ilagiivisa nunap inoqqaavinut ataqqinnittumik pissuseqartarnissaat pingaaruteqartoq, taakkualu, kulturiat, oqaasiini nalliuttorsiortarnerilu allatulli naleqartigisut.
Pavep Inuit ilaquttamisulli pillugit Inuit inuusuttaat qaffasissumik anguniagaqaqqullugit kaammartorpai, taakkuummatamigooq inuiaqatigiit apeqqutaannut akisussat.
Pavep Nunavummi oqalugiarnini utoqqatsernermik aammali Inuktitut qujanermik naggaserpaa.
Pave Francis Iqalunniit aallalermat Nunavummi utoqqartat, Guvernør general Mary Simon naalakkersuisullu siulittaasuat Paloosie Akeeago mittarfimmi inuulluaqquseqataapput.
Pave maanna 85-inik ukiulik canadameereerluni Vatikanemut uterami nalunaarpoq ukioqqortusigami pitsorluttunngoramilu nunanut allanut siunissami angalarpiassaassalluni.
