Peqqinnissaqarfik coronamut akiuussummik neqerooruteqarunnaartoq

Covid-19-imut akiuussusertikkusukkuit maannangaaq periarfissaqarputit.

Nunatsinnimi peqqinnissaqarfik coronamut akiuussusertinnissamut neqeroortarnini januaari qiteqquppat unitsissavaa. Immikkulli pisariaqartitsisut suli periarfissaqartinneqassapput.

Nunatsinni nakorsaaneqarfik tusagassiuutinut nalunaarummi taama allapput.

- Pissutsit nalinginnaanerusut maanna atulernikuuagut. Taamaammat ingerlatsineq aamma nalinginnaasumik ingerlatseqqilissaagut. Nunarput tamakkerlugu januaarilli aallartissimatsiarnerani suli periarfissaassaaq, nunatta nakorsaanera Henrik L. Hansen oqarpoq.

Nunarsuaq tamakkerlugu corona tuniluutilermat 2020-mi akiuussusersuineq aallartippoq. 15-iniit qummut ukiullit akiuussusertinnissaminnut neqeroorfigineqarput, ukiulli kinguliini meeqqat tallimmeereersimasut aamma akiuussusertinnissaminnut neqeroorfigineqartalerput.

AAMMA ATUARUK Alle corona-restriktioner er ophævet

18-iniit 49-t tikillugit ukiullit akiuussummik pingasoriarlutik kapitinnissamut neqeroorfigitipput. 50-ileereersimasullu sisamassaanik kapitinnissaminnut siorna aamma neqeroorfigineqarlutik.

Akiuussusersuinerli maanna unittussanngorpoq.

Nualluut corona nualluutitut nalinginnaasutut qaammat kingulleq nalunaarsorneqalerpoq. Tassa coronamut killilersuutit tamarmik atorunnaarsinneqarput.

Danksit peqqissutsimut aqutsisoqarfiata Danmarkimi corona nualluutitut nalinginnaasutut nalunaarutigineqarnerata kingunitsianngua nunatsinni aamma taama nalunaarutigineqarpoq.

- Akiuussusertinnissamut neqeroortarunnaariartuaassaagut. Akiuussutissanillu pisiniartarunnaarallassalluta, taanna oqarpoq.