Takornariaq qaammaterpaalunni Perumiittariaqarsimasoq Machu Picchumut kisimi takornarniartoq

Japanimiu inkat najugaqarfigisimasaannut Machu Picchumut takornarniarnissaminut marsimili bilitseqarpoq, bilitsinilu kiisami atoqqammerlugu.

Allattoq Ritzau

oktobarip 13-at 2020 10:30

Nutserisoq Jaaku Lyberth

Naammagittarneq iluaqutaasoq, Perumi takornariap japanimiup upperseqqammerpaa.

Japanimiumi, Jesse Takayama, coronavirusip nunarsuaq tamakkerlugu tuniluunnerani qaammatini arfineq-marlunni Perumiittariaqarsimasoq, nunarsuarmi tamarmi tusaamaneqartumut inkat najugaqarfigisimasaannut Machu Pichumut kisimi takornarniarnissaminut akuerisaasimavoq.

Marsimili qinnuteqaataa kiisami akuerineqarmat taamaaliorsinnaasimasoq, Perup kulturimut ministeria Alejandro Neyra ataasinngornermi nassuiaavoq.

AAMMA ATUARUK Nunarsuaq tamakkerlugu coronavirusimik tunillatsissimasut 27 millioninngortut

Takayama Machu Pitchup eqqaani upernaarli Aguas Calientesimiippoq.

Takayama illukunut ukiunik 500-nik pisoqaassusilinut Unescollu nunarsuarmiut eriagisassanngortitaanut takornarniarnissaminut marsimili bilitseqarpoq, bilitsinilu arfininngormat kiisami atorlugu.

Taassuma Machu Picchu takornarniarlugu ulluni ikittuinnarni Perumiinnissani pilersaarutigisimagaluarpaa.

- Manna tupinnartorujussuuvoq. Qujanarujussuaq, Takayama videomik Machu Pitchumi qaqqap qaani immiussinermini oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.