Elitesport Piginnaasaqarluartut aallunnerisigut OL-imut peqataatitsisarnissaq anguniarneqassaaq
Taamaattoqassappalli piginnaasat ineriartortinneqassapput aamma meeqqat inuusuttullu timersornermik soqutigisaqartittuarnissaat pingaaruteqarpoq. Elite Sport Greenland taama oqarpoq.
Naak nunatsinni innuttaasut 56.000-tiinnaagaluartut Martin Mølleritut timersullammaat amerlanerulersinnaapput.
Elite Sport Greenlandimi siulittaasoq taama oqarpoq.
- Nunatsinni soorunami aamma periarfissaqarpoq timersornerup iluani ineriartortitsilluarnissatsinnut taavalu timersuutini ataasiakkaani nunarsuarmiooqatigiit iluanni qaffasinnerpaanut peqataasarnissatsinnut, Malik Hegelund oqarpoq.
Ujakkaartartut, sangusaartartut assammillu arsartartut, Malik Hegelund Olsenip ilaatigut piginnaanilittut assersuutigai.
Piginnaasat inerisarneqassapput
Nunarpulli Martin Mølleritut timersullammaqarnerulissappat piginnaasat assigiinngitsut inerisarneqartariaqarput.
- Periarfissaqarpoq taamatut timersornerup iluani ineriartortitsilluarnissatsinnut taavalu timersuutini ataasiakkaani nunarsuarmiooqatigiit iluanni qaffasinnerpaani peqataasinnaasarnissatsinnut, siulittaasoq oqarpoq.
Tamannalu anguneqassappat sungiusaasut pitsaanerit amerlanerusariaqarput.
- Sungiusaasut pikkorinnerusut, soorunami tunniusimasorpassuaqarpoq, kisianni sungiusaasunik aamma ineriartortitsineq ingerlalluartariaqarparput.
AAMMA ATUARUK Elite Sport Greenland: Timersortartut piginnaasaqartut amigaatigaagut
Meeqqat inuusuttullu sapinngisamik timersuummik aallutaqartuaannarnissaat, Malik Hegelund Olsenip oqaatigaa. Timersuutit assigiinngitsorpassuit tassani pineqarput, tamannami meeqqat aalassarinnerulernerannik timersornermillu soqutigisaqarnerulernerannik kinguneqassasoq siulittaasoq isumaqarpoq.
- Timersortartut ineriartortittuaannarsinnaagutsigit inuusuttunngornerininngaanniit taava taamaasilluta timersornerup iluani angusaqarsinnaasut amerlisassavagut taavalu aamma piginnaasaat qaffassarlugit, Elite Sport Greenlandimi siulittaasoq KNR-imut oqarpoq.
Timersortartut inerisartuarnissaat pingaaruteqarpoq. Martin Møllerimut Koreap Kujallermi OL-erneq nunani allani unamminerit kingullerissagunaraat, KNR-imut oqaatigaa.
Nunatsinneersoq kalaaleq freestylemik sisorartartoq, Laila Friis Salling OL-ertoqalerpat aamma ilaasussanngorpoq.
