Pilersuisup nioqqutissat aalajangersimasut akikilligai
Pilersuisup pisiniarfiini sapaatip akunnerani matumani akit apparput. Immuk kimikinneq sapaatip akunnerata siulianit maanna 1 koruunimik akikinneruvoq.
Covid-19-ip Europamilu sorsuttoqarnerata kingunerisaanik akit qaffangaatsiarput. Aaqqiissuteqarnissaq kissaatigineqarpoq, taamaammat Naalakkersuisut Royal Arctic Linemut 30 millionit koruuninik immikkoortitsinissaat Inatsisartut Aningaasaqarnermut akileraartarnermullu ataatsimiititaliap septembarip 23-anni akueraat.
AAMMA ATUARUK Naaja Nathanielsen: Ikiorsiinissaq tulluarnerpaanngilaq pisariaqarporli
Tassa imaappoq Royal Arctic Linep Naalakkersuisullu nillataartunik qerisunillu – tassa nerisassanik assartuinermut uuliamut tapinik appaanissamut isumaqatigiissuteqarput.
Royal Arctic Linep nunap aningaasaanut uuliamullu tapii ukioq manna siusinnerusukkut pingaartumik Ruslandip Ukrainemut saassussinerata kingunerisaanik akitsorput. Orsussammi akiata qaffangaatsiarneranik tamanna kinguneqarpoq. Akillu assigiinngissutaat pisisartut kisimik akilersinnaavaat.
Nioqqutissat Pilersuisumi akikillineqartut tallimat
Malteskorimit qapuaqqat 11,8 g.: Siullermik akia: 2,95 kr. Ullumikkut: 1,95 kr.
Immuk kimikinneq 1,6 procent, 1 literi: Siullermik akia: 15,95 kr. Ullumikkut: 14,95 kr.
Arlamit pære/banan yoghurti akuutissartaqanngitsoq,150 g: Siullermik akia: 8,95 kr. Ullumikkut: 6,95 kr.
Kærgårdenimit punneq 75 procenti, 200 g.: Siullermik akia: 26,95 kr. Ullumikkut: 24,95 kr.
Schulstadimit toastit 600g: Siullermik akia: 39,95 kr. Ullumikkut: 38.95
Tamanna nioqquteqartuni malugineqarsinnaavoq. Pilersuisup nioqqutissaatini ulluinnarni atorneqarnerpaasartut 140-t 1 koruunimit 3 koruunimut oktobarip tallimaanni akikillivai.
- Suut tuninerpaasarnerigut aallaavigalugit nioqqutissat aalajangerpagut. Tassa imaappoq pisisartutta pisiarinerpaasartagaat, taamaalilluta pitsaanerpaamik sunniuteqartitsissalluta, Pilersuisup pisortaa, Brian Weuge Chemnitz oqarpoq.
Nioqqutissat 2020-mi septembarip aallaqqaataanit 2021-mi juunip aallaqqaataanut pisiarineqarneraat aallaavigalugit nioqqutissat aalajangerneqarput. Nioqqutissat inuulluarniutit soorlu tupat, viinit, imigassat immiaaqqallu akikillisanut ilaatinneqanngillat.
Akinik appaanermi nioqqutissat 140-t 6,4 procentimik akikilliliineq assigaa.
Akit aappaagu juunilu taamaaginnassasut
Pilersuisup nioqqutissanik akinnerusunik toqqaanani 140-nik akikiliinnissamut toqqaaneranut siammasinnerusumik akikiliinnissaq pissutaasoq, Brian Weuge Chemnitz oqarpoq.
AAMMA ATUARUK Nioqqutissat ilaat akitsorrattut: Qallersuutissat 10 koruuninik akitsortut
Taassuma akinik appaanerit pisisartunut qanoq isumaqarnerata paasiuminaassinnaanerat paasisinnaavaa.
- 1 koruunimit 6 procentimut annertorpalunngissinnaavoq, kisianni immummik, kaffinik iffianillu qerisunik pisiguit akikinnerulersimasoq malugineqarsinnaassaaq, Brian Weuge Chemnitz oqarpoq.
Pilersuisup ukiuuneranut nioqqutissarsiarisaasa annerpaartaat tunumi nunattalu avannaani nioqqutissaammata tassanilu uuliamut nunallu aningaasaanut tapit appasinnerummata Pilersuisumi pisisartut ukiuunerani nioqqutissat uku akiisa aalajangersimasuunissaat naatsorsuutigisinnaavaat.
- Tassa imaappoq nioqqutissat sipaarutit uku atorlugit pisiarivagut, taamaammallu nunatta avannaanut pilersuileqqinnissatta tungaanut akit aappaagu juunip missaata tungaanut aalajangersimasuutissavagut, Brian Weuge Chemnitz oqarpoq.
Brugseni suli oqaaseqarsinnaanngitsoq
Pilersuisoq kisiartaalluni akinik appaassanngilaq. Pisiffiup nioqqutissat ulluinnarni atorneqartartut aalajangerisimasut isumaqatigiissuteqarnerup aqaguani appartareersimagai Pisiffiup Sermitsiaq.ag-mut oqaatigaa.
- Siunertaasup tapersernissaa aamma sipaaruteqarnerup pisisartunut iluaqutaanissaa Pisiffimmut qularutissaanngitsumik pingaaruteqarpoq, Pisiffiup pilerisaarinermut pisortaa, Tina Hansen Sermitsiaq.ag-mut oqarpoq.
AAMMA ATUARUK Pilersuisoq: Corona og krig er skyld i prisstigninger
Brugsenili nalunaaruteqarnissamut suli piariinngilaq.
Brugsenip tuniniaanermut pisortaata, Jes Nyborgip Brugseni akinik appaasinnaaneq suli aalajangiiffiginngikkaa isumaqatigiissummullu atatillugu apeqqutip akineqarnissaa utaqqineqartoq oqaatigaa.
Taakkumi isumaqatigiissut sikusartuni kisimi atuunnersoq imaluunniit Nuuk aamma ilaatinneqarnersoq paasilluanngilaat. Brugseni Royal Arctic Linemut saaffiginnikkami Aningaasaqarnermut Naalakkersuisoqarfimmut innersuunneqarpoq, tassanngali suli akissuteqartoqanngilaq.
- Suut utertissinnaanerlugit paasisariaqarparput, taamaanngippat isigisaqarani biilerneq assigiinnassavaa, Jes Nyborg oqarpoq.
