Pinngortitaleriffik saattuanik amerlanerusunik aappaagumut pisassiissuteqarnissaanik innersuussuteqartoq
Biologit nunatta kitaani aappaagumut saattuartassiissutit ukioq mannamit amerlanerunissaat innersuussutigaat.
Pinngortitaleriffik tusagassiuutinut nalunaarummi taama allappoq.
Aalisarfinni angisuuni pingasuni saattuaqarneruvoq. Tamanna biologit misissuinerata kingulliup takutippaa.
Aqutsiveqarfiit pineqartut tassaapput Qeqertarsuup Tunua, Sisimiut eqqaani sinerissap qanittua, aamma Aqutsiveqarfik Nuuk-Paamiut.
AAMMA ATUARUK Naalakkersuisut saattussanik attanneqarsinnaasumik ingerlatsinermut ilisarnaateqalerniartut
Upernaviup eqqaani sinerissap qanittuani, Maniitsup Kangaamiullu eqqaani sinerissap qanittuini kiisalu Narsap eqqaanit Nunap Isuanut biologinit siunnersuiffigineqarneq ajorput.
Naalakkersuisut biologit innersuussutaanik tapersiissagunik Qeqertarsuup Tunuani 2022-mi pisassiissutit 796 tonsimut amerlineqarnissaat qilanaarutigineqarsinnaassavaat.
Aqutsiveqarfimmi tassa saattuarniartartut ukioq manna 617 tonsinik pisaqarput.
Marsimit juulimut saattuarniarsinnaanissaq innersuussutigineqartoq
Aalisarfinnut Sisimiut eqqaaniittumut aamma Nuummi Paamiunut aamma taamaappoq.
Aqutsiveqarfimmut Sisimiut eqqaani sinerissap qanittuani 2022-mi pisarineqartut 547 tonsinik amerlanerunnginnissaat innersuussutigineqarpoq. Taamaattoqassappallu pisarineqartut ukioq mannamut sanilliullugit 90 tonsimik qaffariaateqassapput.
Sisimiut avataani 2022-mi pisassiissutissat 102 tonsimik annerunnginnissaat innersuussutigineqarpoq. Tamanna ukioq manna pisarineqartunut sanilliullugit 20 procentit missaannik qaffariarnerussaaq.
AAMMA ATUARUK Naalakkersuisut saattuarniarnermut aalisartunut nutaanut akuersissuteqarnavianngitsut
Nuummiit Paamiunut pisassiissutigineqartut 2022-mi 35 procentimik qaffariaateqassasut, taamaalilluni 1020 tonsit sinerissap qanittuani pisarineqarsinnaassasut innersuussutigineqarpoq.
Aamma Nuummiit Paamiunut avataani pisassiissutit aappaagu qaffariarnissaat innersuussutigineqarpoq, taamali annertutiginngitsumik. Pisassiissutit ukioq mannamut sanilliullugit 26 procentit missaannik tassa 302 tonsimik pisaqartoqarsinnaalersillugu qaffanneqarnissaat innersuussutigaat.
Marsimiit juulimut saattuarniartoqarsinnaalernissaa Pinngortitaleriffiup innersuussutigaa, taamaalilluni saattuanik nutaanik aalisarneqarsinnaalersussanik, saattuaqassutsip pilersornera qulakkeerneqassalluni kiisalu saattuanik tunineqarsinnaanngitsunik pisaqarnissaq pinaveersaartinneqassalluni.
KNR-ip aalisarnermut naalakkersuisoq, Aqqaluaq Biilmann Egede Pinngortitaleriffiup innersuussutaanut isumaanik paasiniaaffiginiarlugu attaveqarfigaa, taannali suli akissuteqanngilaq.
