ASSIT Pinngortitamik assiliisartoq Nanortaliup Katersugaasiviani saqqummersitsilersoq
Henrik Hansen Nunatta pinngortitarsuanik uumasuinillu, nunatta qaqqarsuinit narsaamanersuarnilu allanit tikinneqarpiarneq-ajortunit 2008-miilli assiliisalerpoq.
- Uppik, nanoq, arferit nattorallillu qanillivillugit takukkit. Qaqqap qaavani pujorasaartumi nittaattumilu qanoq innera malugiuk. Nunami imaanilu pinngortitaq allatorluinnaq misigisaqarfigiuk, Nanortaliup Katersugaasivia tusagassiorfinnut nalunaaruteqarluni taama allappoq.
Nunatta pinngortitarsua qanillivillugu
Kangerlunni qaqqarsuarnilu, aasaagaluarpat ukiuugaluarpat, silalu qanoq-ikkaluarpat Henriup pinngortitaq pikkunartoq alianaatsorlu nunatta ilisarnaatigisaa nalissaqanngitsumik kusanassusilimmik assilisarpaa.
Henrik assiliigaangami assiliniakkani qanillivissorusuttarpai, isiginnaartoq taamaalilluni najuuttutullusooq misigitikkumallugu, katersugaasivik ilaatigut taama allappoq.
Henrik ilaquttanilu Nanortalimmi najugaqarput, takornarianik umiatsiamik angallassisartuuvoq saniatigullu entreprenøreqarfimmi sulisarluni. Henrik assilisanik unammisitsinermi siornatigut ajugaasimavoq kingornalu soqutigani ingerlateqqissimavaa saqqummersitassaminillu piareersaalluni.
Atuakkamik saqqummersitsiniarluni maanna piareersaateqarpoq.
