Pisiniarfissuarmi Field´s-imi aallaasersortoqarnerata kingorna inuk ataaseq tigusarineqartoq

Københavnemi Politiit attaveqatigiittarfikkut Twitterikkut allapput, Københavnip avataani Amagerimi pisiniarfissuarmi Field´simi aallaasersortoqarnerata kingorna inuk ataaseq tigusarineqarsimasoq.

Inuit arlaqartut aallaasersortoqarnerani eqqorneqarput.

Aallaasersortoqarnerani tigusarineqartup kinaanera politiinit paasissutissiissutigineqanngilaq.

- Pisiniarfissuarmi Field´s-imi aallaasersortoqarnerani inuk ataaseq tigusarineqarpoq. Taassuma kinaanera maannakkut oqaluttuarisinnaangilarput, politiit taama allappput.

Amerlasoorpassuulluta Field´simiippugut qanorlu pisoqarnera pillugu paasiniaavugut. Paasisat kingulliit pillugit nutaanik paasissutissiisassaagut.

Pisiniarfissuarmi Fild´s imi sapaammi ualikkut aallaasersortoq nalunaarutigineqareersorlu politiit amerlasuut Fieldsimiipput

Qulimiguulik pisinarfissuarmik qulavaavoq.

Inuit pisiniarfissuarmi Field´simiigiinnarnissaat utaqqimaarnissaannillu politiinit peqquneqarput. Allat tamarmik pisiniarfissuarmut qanillattussanngitsut politiit nalunaarput.

Assit tusagasssiorfinni takuneqarsinnaasut naapertorlugit inuk ataaseq pisiniarfissuarmit akiutinit anninneqartoq takuneqarsinnaavoq.

Inuit arlalippassuit pisiniarfissuarmit arpallutik aniasut TV-ikkut assilisani takuneqarsinnaapput.

Inuit qiallutik erserpasittut assini takuneqarsinnaapput. Allat assatik illuttut niaqquminniitillugit arpattut takuneqarsinnaapput.

Pisiniarferujussuaq Field´s Amagerimiippoq Ørestadimi. Danmarkimi pisiniarferujussuit annerit ilagalugu.

Pisiniarferujussuaq Field´s metrot unittarfiata akianiippoq, metrollu maanna Vestamagerimi DR Byenimilu uninneq ajorput.