Piterarnerata kingorna igalaassat Tasiilamut kiisami tikittut
Tasiilami qaammatit pingasut matuma siorna sakkortuumik piterarpoq. Igalaat piteqqamit aserorneqartut taartissaat kiisami tikipput.
- Igalaassat umiarsuup ippassaani tikiuppai, ippassarlu tiguagut. Igalaat aserornikut siulliit ippassaq taarserneqareerput, maannalu taarsersuileruttorput, nuannaajallannanngitsuunngilaq.
Taama oqarpoq inissiaatileqatigiiffiup Iserit Tasiilami immikkoortortaani teknikeqarnermut pisortaq Michael Waaentz. Taassuma Tasiilamilu innuttaasut allat septembarip 24-ni sakkortuumik piterarmat igalaanut aserutitsersimasunut taartissat qaammatini pingasuni utaqqivaat.
Illut qalii igalaallu aseruatiterput. Kommunip inissiaatileqatigiiffia, Iserit aqqutigalugu inissiaannarni igalaat 120-nit 130-nut amerlassuseqartut taarserneqartariaqarput. Tasiilamilu igalaat sillimmataasut taama amerlatiginngillat.
AAMMA ATUARUK Op til 130 vinduer skal skiftes i Tasiilaq efter piteraq
Taamaammat Royal Arctic Line umiarsuarmik assartuummik immikkut tikisitsivoq – taakkulu marlunngormat tikipput.
- Igalaat tamavimmik piteqqap aserugai soorunami taarsersorneqassapput. Igalaat silarliit anorersuaqqinnissaanut qajannaaneruniassammata igalaassanik qajannaannerusunik aamma taarsernessapput, Michael Waaentz oqarpoq.
Inissiaatileqatigiiffik 700.000 kr.-nik akiliuteqarsimasoq taassuma missiliorpaa.
Anitse taarmiuujunnaartoq
Anitse Ignatiusen piterareermalli taarmiuujuartarsimavoq, igalaammi aserornikut qisunnik assersorneqarput. Tassumalu taarmiuujuartarnini qatsulluinnarpaa.
Igalaat aserornikut qisummik assersukkat. Asseq: KNR
- Taarmi ipilersutut misigisimavunga. Qulliit inimittut ullaamiit unnukkut innarnisatta tungaanut ikumaannavittarput, angerlarsimaannartoq Anitse Ignatiussen.
- Illup silaannarissaqqinnissaa qilanaarnaqaaq, maqaasinikooqaarami, taanna oqarpoq.
Inuit 47-t qimagussortinneqartut
Umiarsuaq assartuutaasoq kingulleq novembarip tallimaata missaani tikittussaagaluarpoq. Umiarsuarmili tassani piterarneranit ajoquserneqartunut tamanut aaqqissuinissamut atortussat ilaanissaat qulakkeeqqanngilaq.
Taamaammat Kommuneqarfik Sermersuumi borgmesterip tulliata, Justus Hansenip (Demokraatit) Tasiilamilu najugaqartup Royal Arctic Line attaveqarfigaa. Kommunip Tasiilami immikkoortortami pisortaa, Hjørdis Viberg aamma taamaaliorpoq.
AAMMA ATUARUK Dana og hendes familie var de første, der blev evakueret under piteraq
Tasiilami septembarip 24-ata 25-atalu akornanni piterarpoq. Anorip sakkortunerpaanerani tassa sekundimut 50 meterinik sakkortussuseqarnerani angallatit anorimit teqqaasinneqarput. Illoqarfiup aqquserngini qulliit uppipput innaallagiaarullunilu. Igalaat sioqqanit ujaqqanillu teqqaasunik aserorterneqarput.
Inuit 47-t unnuap ingerlanerani qimagussortinneqarput, qujanartumillu ajoqusertoqarani.
Illut ilaasa qaliai piterarnerani aserorput. Assiliisoq: Else Olsvig
