Uuliap Polenimi aqqutaa putusimasoq
Ruslandimit Europamut uuliap aqqutaata ilaa Polenimiittoq marlunnik putusimavoq.
Polenimi uuliap aqqutaanik suliaqartartoq, Pern, taama nalunaaruteqarpoq.
Uuliap aqqutaa putusimasoq marlunngornermi unnukkut paasineqarpoq, qanorlu ililluni putusimanersoq suli ilisimaneqanngilaq.
Piaaraluni putuneqarsimanissaa Polenimit naatsorsuutigineqanngitsoq, Polenimi atorfilittat qullersaat ilisimatitsivoq. Nalaatsortumik putusimasoq ilimagineqarpoq.
AAMMA ATUARUK Sverigemi unnerluussissussaatitaasut gassip aqqutaat pinerluffigineqarsimasutut nalileraat
Uuliap aqqutaa taanna Druzhbamik ateqarpoq. Druzhba russitut isumaqarpoq "ikinngutigiinneq". Druzhba nunarsuarmi uuliat aqqutaasa takinersaaraat, taannalu uuliamik Ruslandimit Europap qiterpasissussuata annersaanut pilersuisuuvoq.
Tyskland, Polen, Hviderusland, Ungarn, Slovakiet aamma Tjekkiet uuliamik tassannga pilersorneqartunut ilaapput.
Gassit aqqutai Østersøp naqqaniittut Nordstream 1 aamma 2, sapaatit akunneri marluk matuma siorna putuneqarput, taakkualu piaaraluni putuneqarsimasut nalilerneqarpoq.
