Politiit akileraarutinik utertoortoqarnerani: Ulluinnarni taamak ulapitsigineq nalinginnaasuunngilaq

Kalaallit Nunaanni politiit ulluinnarni nalinginnaasumik eqqissisimanerusaraluarlutik nunarput tamakkerlugu ulluni kingullerni ulapinnerusut, politiit pigaartuisa pisortaat Bent Johnsen KNR-mut oqarpoq.

- Akileraarutinik utertoortoqarsimanera nuna tamakkerlugu malugisinnaavarput, nuna tamakkiivillugu aalakoortoqangaatsiarpoq.

Inuit akileraarutinik utertoortoqarnerani aalakkussimasut ilaatigut eqqissiviilliortitsisuusut, Bent Johnsen oqarpoq.

- Assigiinngitsunik suliaqaqattaarpugut inuit aalakoorlutik angerlarsimaffinni eqqissiviilliortitsisut, silami eqqissiviilliortitsisut, tikilluaqqusaanatik aalakoortut iserniarsarisut amerlapput. Akileraarutinik utertoorsimasut malunnartorujussuuvoq.

Piffissallu taamaalinerani nalinginnaasumik pisarnermiit ulapinnerusarlutik, Bent Johnsen oqarpoq.

Allaanngilaq sapaatip akunnera naasoq

- Akileraarutinik utertoortoqarsimatillugu malunnartorujussuusarpoq ulapinnerusartugut, ulloq akileraarutinik utertoorneq ulluinnaagaluartoq Kalaallit Nunaat tamakkerlugu assut malugivarput.

Nunarput tamakkerlugu politiit ulapingaatsiarsimasut, pigaartut pisortaat oqarpoq.

- Ulapilaangaatsiarpugut oqareernittuut perulluliortitsisut angerlarsimaffinni aqqusinermilu aalakoortut amerlagamik, oqarsinnaanngilangali qassiunersut, kisianni amerlapput Kalaallit Nunaat tamaat agguaqatigiissillugu ulapititsilaangaatsiarput.

Illoqarfinni assigiinngitsuni politiit aamma ulapissimaqaat, pigaartut pisortaata oqarnera naapertorlugu Nuummi politiit ulapinnerpaasimapput.

- Agguaqatigiissillugu Nuummi amerlalaarput, immaqa Nuuk malunnarnerpaavoq, kisianni illoqarfiit allat annertunerusumik maluginianngilakka, oqarsinnaavunga illoqarfinni allani weekendtini ulapputigisartakkagut massakkut ulluinnarni ulapputigivagut akileraarutinik utertoortoqarnera peqqutaalluni.