Politiit angut maqaasineqartoq suli ujaaraat
Emil Biilmannip Maniitsumeersup kingullermik takuneqarneranit sapaatip akunneranngungajalerpoq.
Taamaammat Kalaallit Nunaanni Politiit angutip 59-inik ukiullip ujaarineqarneranut ikioqqeqqupput.
- Suliamut atatillugu nutaarsiassaqanngilaq, kisianni misissueqqissaarnitsinni aarlerinartorsiornissaanut ilimasunnissatsinnut tunngavissaqanngilagut. Taamaammat SAR-imik ujaasinermik aamma aallartitsisoqanngilaq, Kalaallit Nunaanni Politiit KNR-imut oqarput.
Emil Biilmann siusinnerusukkut tammaaneqareerluni nassaarineqaqqinnikuusimasoq politiit paasissutissiissutigaat. Taamaammat ujaarineqartup nammineq takkuteqqinnissaa aamma neriuutigaat.
AAMMA ATUARUK 59-inik ukiulik Maniitsumeersoq politiinit ujaarineqarpoq
Politiilli inunnit ujaarineqartup sumiissinnaaneranik ilisimannittunik attavigineqarusupput.
- Innuttaasunit ilisimannissinnaasunik attavigineqarusuppugut, politiit kaammattuipput.
Ujaarineqartoq takuneqarsimaguni attavigineqarsimagunilu taakku politiinut 70 14 48-mut attaveqaqquneqarput.
Ujaarineqartoq, Emil Biilmann 160 centimerisut angissuseqarpoq nerinnalaartuulluni naatsunik qinnertunik nujaqarluni. Isaruaqarpoq tungujortumik ulluinnarni atortakkaminik jakkeqarpoq tungujortoq-taartumik qalipaatilimmik qarleqarluni, tassa cowboybukseqarluni, kamippaqarpoq qernertumillu nassaqarluni.
