Politiit juullikkunni ulapissimasut: Politiinut ullut qulit ingerlaneranni nalunaarutiginninnerit 1100-t
Inuit juullikkunni ukiortaanngulerneranilu ulapputtarput, politiillu piffissami tassani aamma ulapputtarlutik. Juullip ukiortaallu nalaani politiinut nuna tamakkerlugu ullut qulit ingerlaneranni nalunaarutiginninnerit katillugit 1099-iusiimapput. Politiit tusagassiutinut nalunaarummi taama allapput.
- Ulapissimaqaagut, kisianni siooragisatsitut ulapitsiginngilagut. Tamanna ilaatigut piareersarluarsimanitsinnik pissuteqarpoq, kisianni aamma ukiup siulianut sanilliullugu suliat
ilungersunartut ikinnerupput, soorlu siorna ullualuit ingerlanerinnaani toqutsinerit
marluk pipput, taakkulu politiiniit isumagivagut. Tamanna tungaatigut ukioq manna eqqissisimasutut taaneqarsinnaavoq.
Brian Thomsen, Kalaallit Nunaanni Politiineersoq oqarpoq.
Nalunaarutiginninnerit tassaapput inuit politiinut nalunaarutiginninnerisa katillugit amerlassusaat, politiit nalunaarusiortarnerinut ilanngunneqartartut. Tassaasinnaapput innuttaasut politiinut tunniussinerat, aqqusinermi angallannermi pakasaalluni misissuinerit, annaassiniarnerit, pinngitsaaliiniarnerit toqutsinerillu assigisaallu.
Politiillu suliassanngortitsigaangata isumaqarpoq inatsisinik unioqqutitsisoqarsimasoq, imaluunniit arlaatigut pisoqarsimappat politiit misissuiffigisariaqagaannik.
- Kalaallit Nunaanni Politiit
Nalunaarutiginninnerit ikinnerit suliassalli amerlanerit
Nalunaarutiginninnerit ukioq manna ikinnerugaluartut suliat aallartinneqartut ukioq kingullermut sanilliullugu amerlanerupput.
Decembarip 23-aniit 27-ata tungaanut aamma decembarip 30-aniit januaarip pingajuata tungaanut nunatsinni politiinut nalunaarutiginninnerit 1.099-iupput, taakkunanngalu 214-it suliassanngortinneqarlutik. Ukioq kingulleq piffissami tassani nalunaarutiginninnerit 1.200-pput suliassanngortineqartullu 182-iullutik.
- Ukiumiit ukiumut inuit nalunaarutiginnittartut assigiinneq ajorput, taanna pissusissamisoortuuvoq, inuimmi qassit sianissanersut soorunami nalusaratsigu. Nalunaarutiginninnerillu ikinnerugaluartut suliassat aallartinneqartut amerlanerupput, tassungalu assigiinngitsunik peqquteqarpoq. Siorna ukiup aallartinnerani suliassat ilungersunartut, sulisussanik atuinissamik pisariaqartitsingaatsiartunik suliassanik suliaqarnikuuvugut, Brian Thomsen, Kalaallit Nunaanni Politiineersoq taama oqarpoq.
Juullip ukiortaallu nalaani politiinut nuna tamakkerlugu ullut qulit ingerlaneranni nalunaarutiginninnerit tassa 1100-t missaanniipput, siorna piffissap taamaalineranut naleqqiullugu 100-nik ikinnerullutik.
Naallu politiinut nalunaarutiginninnerit siornamut naleqqiullugit ikinnerulaaraluartut, politiit suliassanik ingerlateqqitassanik amerlanerusunik isumagisaqarsimapput, suliassammi pinartut ikinnerunerat pissutaalluni politiit suliassanik isumaginnissinnaanerulersimapput:
- Piareersimasarpugut, taavalu saniatigut piareersartarluta, kisianni ukiuminngaanniit ukiumut nalileruminaattarpoq qanoq ulapitsigissanerluta. Kisianni kingumut qiviaraangatta naluneq ajorparput innuttaasut qanoq qisuariartarnersut, taavalu suut assigiinngitsut siarngutigisarneraat. Taava tassani naleqqussarniartarpugut, sulisut qassit atussanerlugit, Brian Thomsen, Kalaallit Nunaanni Politiineersoq KNR-imut oqarpoq.
Politiit piffissami pineqartumi suut suliassarisimaneraat uani takuneqarsinnaavoq:
