Politiit: Nunatsinni inuusuttut pinerluttuliorneri ikileriangaatsiarput
Inuusuttut pinerluttuliorneri 2022-mi ukiut marlunnut kingullernut sanilliullugit ikileriarput.
Inuusuttut 18-it inorlugit ukiullit akornanni pinerluttuliornerit nalunaarutigineqartut siorna 306-iupput. Taakku 2021-mi nalunaarutigineqartunit 71-inik ikinnerupput.
Tamanna Kalaallit Nunaanni Politiit ukiumoortumik nalunaarsuineranni allassimavoq.
Nalunaarutiginninnerit amerlanerpaat tillinniarnermut imaluunniit aserorterinermut tunngapput, 18 procentiilu toqutsinermik nakuusernermillu pinerluuteqarnerullutik. Nalunaarutiginninnernili tamani imaanngilaq toqutsisoqarsimasoq.
Politiit siorna 18-it inorlugit ukioqartumik ataasiinnarmik toqutsisutut pasisaqarput.
Nakuuserneq aamma kinguaassiutitigut pinerluuteqarnerit
Nukappiaraq 14-inik ukiulik Nuummi eqimattanit februaarip aallartinnerani saassunneqarnermi kingunerisaanik Danmarkimi napparsimmavissuarmut suliaritikkiartortariaqartoq, KNR-ip siusinnerusukkut saqqummiuppaa. Nukappiaqqap isaata aappaata ataani saanermik napisoqarsimavoq.
Meeqqalli inuusuttullu akornanni peqqarniitsumik nakuusertarnerit qaqutigoortuusut, Kalaallit Nunaanni Politiit politikommissæriata tullersortaat, Jan Kristian Geisler nassuiaavoq:
- Takusarpagut, kisianni qujanartumik akuttupput. Suliat taamaattut nukinginnartumik isiginiartarpagut. Taava sapinngisamik sukkasuumik suliariniapallattarlutigit, uku isumaginnittoqarfimmi allallu suleqatigalugit, taanna nassuiaavoq.
Inuusuttut 18-it inorlugit ukiullit akornanni kinguaassiutitigut naapertuilluanngitsuliornerit 61-it siorna nalunaarsorneqarput. Taakkulu inuusuttut pinerluttuliornerisa tamarmik 20 procentiisa missaanniipput.
Nalunaarutiginninnerilli 61-it nassuiaruminaatsut, politikommissærip tullersortaa oqarpoq.
- Assersuutigalugu 16-inik ukiulik 14-inik ukiulimmik atoqateqarsimappat, tamanna unioqqutitsineruvoq. Tamakkoqarsimassammata taakku kisitsisit, taava qanorpiaq isikkoqarsimaneri nalilersoruminaalaarpoq, Jan Kristian Geisler oqarpoq, nangillunilu:
- Imaanngilaq tassa taakku tamarmik pinngitsaaliinerusimasut.
Ikilerujussuartut
Inuusuttut pinerluttuliornerisa amerlassusaat 2020-mi 2021-milu allanngorpallaanngillat, tassa 376-it 377-illu nalunaarutigineqarput. 2022-mi kisitsisit taakku 306-inut ikileriarput.
- Tassani peqqutaaqutigisorivara ukiut kingulliit suliniuteqarnikuugatta pinaveersaartitsinermik tunngasunik politiinit taavalu allat peqatigalugit makku assersuutigalugit kommunit, isumaginnittoqarfiit allallu, Jan Kristian Geisler oqarpoq.
Inuusuttut pinerluttuliornerinik nalunaarsuinermi 40 procentiisa missaat 15-inik ukioqarput.
