Politiit tombolamut malittarisassat pillugit: Peqatigiiffiit kisimik katersuiniarsinnaapput
Qamuteralammik, savap quttoraanik pisiniutissanilluunniik eqquigit. Normu ataaseq pisiarisinnaavat!
Facebookimi assigissaanilu tombolartitsilluni eqquniaasitsinermik allagarsiutani taama allaqqasut piffissami kingullermi takussaapput.
Kisianni, kisianni, kisianni. Tombola assigisaanillu eqquiniaatitsinerit inerteqqutaasut, Kalaallit Nunaanni Politiit nalunaaruteqarput. Kalaallit Nunaanni politiit innutaasunit suliffeqarfinniillu eqqarsarnartoqartitsillutik piffissami kingullermi saaffigineqarput.
Kalaallit Nunaanni politiit allaffeqarfiani pisortap Emil Maegaard-Hoffmannip oqarnera naapertorlugu eqquiniaatitsinerit imaluunniit tombolartitsinerit inatsisinik unioqqutitsissutigineqannginnersut paasiniaasumit saaffigineqarsimapput. Inuit qarasaasiatigut attaveqaqatigiittarfianni Facebookimi siammartikkat marluk pineqarput.
- Saqqummersitani taakkunani marlunni unioqqutitsisoqarsimanersoq politiit maanna naliliiffigisussanngorpaat. Unioqqutitsisoqarsimassappallu politiit nalunaarusiussapput, suliamillu misissueqqissaartoqassalluni, taamaalillunilu inuk imaluunniit inuit pineqartut inatsimmik unioqqutitsisimasutut unnerluutigineqassallutik, Emil Maegaard-Hoffman oqarpoq.
KNR-ip inuit taakku marluk Facebookikkut siammarterisut attaveqarfigai – taakkunannga arlaannaalluunniit apersorneqarusunngilaq. Taakkulu saqqummersitatik maanna peersimalerpaat.
Kalaallit Nunaanni Politiit oqarnerat naapertorlugu tombolartitsinissamut malittarisassat aaku:
Katersuiniarneq imaluunniit eqquissutigineqarsinnaasumik pisineq taamaallaat ukuninnga siunertaqarpat akuerisaavoq:
- Ajunngitsuliornermik siunertaqarpat (Neriuffimmut, Røde Korsimut imaluunniit ajunngitsuliornermut assingusumut) imaluunniit
- Inuit amerlasuut soqutigisaannut tunngappat (meeqqat atuartut angalanissaannut, oqaluffiup iluarsartuunnissaanut assigisaanullu).
Tamanut ammasumik katersuiniarnerit politiinut nalunaarutigineqassapput.
Tamanut ammasumik eqquiniaasitsinerit (Radiokkut bingortitsinerit, qititsitsinerit, isiginnaartitsinerit aaqqissuussalluunniit allat peqataasunit ass. eqqugassaqarfiusut) politiinit akuerineqassapput.
Peqatigiiffik/komité kisimi eqquiniaasitsinermut akuersissummik pisinnaavoq. Taamaammat lottortitsinernik assigisaanilluunniit, aningaasat inunnut ataasiakkaanut suliffeqarfinnulluunniit iluanaarutaasussanngorlugit, akuerisaanngillat.
Peqatigiiffippit tamanut ammasumik katersuiniarnermut imaluunniit eqquiniaasitsinermut piumasaqaatit eqquutsippagit qinnuteqaat immersugassaq, kommunemi innuttaasut saaffiginnittarfianni imaluunniit www.sullissivik.gl–imi, pissarsiarisinnaavat
Politiit nittartagaanni annerusumik atuagaqarsinnaavutit.
Tamanut ammasumik katersuiniarnermi eqquiniaasitsinermi malittarisassanik unioqqutitsineq akiligassiinermik kinguneqarsinnaavoq.
Nalorniguit politiinut aperigit
Politiit allaffeqarfiani pisortap, Emil Maegaard-Hoffmannip aaqqissuussinernut tunngatillugu politiinit ilitsersortittoqarsinnaasoq nassuiaatigaa.
- Unioqqutitsisoqarsimatillugu, politiinut saaffiginittoqartariaqarpoq siunnersortillunilu, qanoq iliortoqarsinnaanersoq pillugu,
- Katersuiniarneq imlauunniit eqquniaasitsineq pineqartillugu, unioqqutitsisoqartorlu ilisimagaanni, kaammatuutigiinnassavarput nammineerluni politiinut saffiginninnissat nalunaaarutigalugulu.
