Politiit: Tunumi sikorsuit sianigisigit
Tunumi umiatsiaararlutik sikorsuit akornannit ingerlariaqqissinnaajunnaarsimasut arlaliusimapput. Taamaammat umiatsiaararlutik aallartut kikkulluunniit nunatsinni politiinit mianersoqquneqarlutillu annanniuteqarlutik aallartarnissaannik eqqaasitsissuteqarfigineqarput.
Tasiilap Kulusuullu eqqaanni umiatsiaaqqat marluk sikorsuit akornannit ungasinngitsukkut ingerlariaqqissinnaajunnaarsimasut, nunatsinni politiit nalunaarput. Angummi ukiukitsorlu annanniutilisaratik sumiinnerminnillu nalunaarutaatilisaratik umiatsiaarartut sikut ingerlaartut akornannit sapaatit akunnerata siuliani allaat ingerlariaqqissinnaajunnarput.
Taakkua sikut akornannit aqaguani ingerlariaqqissinnaanngoramik qiiagaluaqalutik timmut apuupput.
- Sikorsuit ingerlaalertorput. Taamaammat taakkua akornannit ingerlariaqqittoqarsinnaajunnaariataartoqarsinnaavoq, Tasiilami politeeqarfimmi pisortaq Aqqalu Petersen nalunaarpoq.
- Sikorsuit piffissami kingullermi ajoraluartumik navianartorsiortitsisaqattaarput, taamaammallu umiatsiarlutik angalasut kikkuulluunniit mianersoqqunarput.
Nunatsinni umiatsiarlutik angalaniartut kikkulluunniit annanniuteqarlutik aallartassasut, nunatsinnit politiit kajumissaaripput. Tamatigorluinnarlu puttaqutilisarsimanissap, ataallaarsualisarsimanissap, qummoroortitsissutilisarsimanissap, oqorsarsimanissap saniatigullu orsussaqarluarnissap saniasigut VHF-radiolisarsimanissaq taavalu soorlu Garmin InReachimik tassa sumiinnermik nalunaarutaatilisarsimanissaq pingaaruteqartoq, nunatsinni politiit nalunaarput.
