Politikkikkut malinnaasoq: Aki-Matilda misigissusilersorpalaarpoq, Aaja isumatusaarpalaarpoq
Siumumeersut Nuummi Inussivimmi unnussiuaarnerminni nuannateqaat.
Tassami Siumut qinersinermi 40 procenterluinnangajannik taaguunneqaannarani, Aki-Matilda Høegh-Dam 6.655-inik qinersiseqarluni taaguunneqarnerpaavoq.
Aki-Matilda Høegh-Damilu Siumup siuariarneranut peqqutaalluinnartoq, politikkikkut malinnaasoq Sten Lund isumaqarpoq.
- Isumatusaarpalaallaqqiutigaluni misigissusilersorpalaallaqqippoq. Qinersisartut soqutigisaat naalaarluarsimarpasimmagit taakkununnga soqutiginnilersitsilluarpoq. Aamma inoqatinut attaveqaatinik atorluaallaqqippoq. Tamakkua qinersiseqarluaatigai, politikkikkut malinnaasoq naliliivoq.
AAMMA ATUARUK Ukiuni 35-ni aatsaat taama qinersiartortukitsigisoq: Innuttaasut affaanngitsulluunniit qinersipput
Siumumeersulli Aki-Matilda Høegh-Damip qinersisut pingajorarterutaannik taaguunneqarnera oqallorinnerinnaanik peqquteqarani politikkikkut naammassisaqarluarsimaneranik aamma peqquteqartoq, Sten Lund aamma isumaqarpoq.
- Ingammik isumaginninnermi suliassaqarfimmut tunngasuni Folketingimi naammassisaqarpoq. Soorlu assigiinngisitsinermik oqallittoqarnerani politiit pineqaatissinneqarsimasunullu inissiisarfinni nakkutilliisut akissarsiaat assigiikannilerallarput, Sten Lund oqarpoq.
Aki-Matilda Høegh-Dam Folketingimut 2019-imi aamma qinigassanngortippoq. Siumut taamani qinersinermi 8,5 procentinik kinguariarput, taamaammat Siumup marlunngormat qinersinermi angusaa siuariaqqingaatsiarnertut taaneqarsinnaavoq.
Folketingimut 2019-imi 2022-milu qinersinerni taaguussinerit qanoq agguataarsimanersut takussutissiami ersipput. Sukaasat qiterliit (tungujortut qasiartut) KNR-ip misissueqqissaartarfimmik Aperaa.gl-imik oktobarip 24-ani qinersisinnaasunik isumasiuisitsineraneersuupput. Qinersisinnaasuni inuit 578-it mobiiliinut sianerluni isumasiorneqarput, taakkulua Folketingimut novembarip aallaqqaataani qinersiniarnersut taamaaliussagunillu partiini sorleq qinerniarneraat aperineqarput.
Isumasiukkat nunatta inuisa agguarsimanerinut naapertuupput. Tassalu suiaassusaat, ukiui najugaqarfiilu isumasiuinermi aallaaviupput. Taamali periuseqarluni isumasiuinerup inernera nalorninartoqartuaannarpoq, isumasiuinerullu taassuma inernerata nalorninarnerpaaffia +/÷ 4,7 procentpointiuvoq.
Qinersisikinneruleqqeriaannassanngikkunik imminnut qiviaqqittariaqartut
Aaja Chemnitz Inuit Ataqatigiillu ukioq manna qinersinermi kinguariaraluarlutik, Aaja Chemnitz Folketingimut 2019-imi qinersinerminngarnit 1380-inik taaguunnikinnerugaluarluni qinigaaqqippoq.
Taakkua kinguariarnerat Demokraatit Inuit Ataqatigiit qinersiserisarsimasaasa ilarpaaluinik taaguunneqarnerannik peqquteqartoq, Sten Lund isumaqarpoq.
- Aajap qinersiserisimasartagaasa ilarpassuisa Anna Wangenheim qinersimannguatsiarpaat. Aaja qineqqusaarnerni misigissusilersorpalaarpallaarani isumatusaarpalaarlunili sassartarnera qinersisartunik soqutiginnilersitserpiannginneranik kinguneqarunarpoq.
AAMMA ATUARUK Demokraatit taaguunneqarnerit pingajunngorpoq - Atassullu taaguunneqarnikinnerpaalerluni
Inuit Ataqatigiit qinersiseqarneruleqqinniarunik politikkikkut oqaatigisartakkatik nunatsinni Folketingimilu qanoq nikinganeqartinnaveersaassanerlugit isumaliutigisariaqaraat, Sten Lund isumaqarpoq.
- Inuit Ataqatigiit imminnut qiviaqqittariaqarput aperalutik, nunatsinni naalagaaffimmilu politikkikkut pingaartitaminnik qanoq pitsaanerusumik angussisinnaanerlutik. Múte B. Egedep partiit siuttuisa oqallinneranni tamanna aamma nassuerutigaa.
Inuit Ataqatigiit Folketingimut 2011-mi qinersinermi qinersisinnaasut 40 procentiinit amerlanerusunik taaguunneqarput, ukioq mannalu qinersinermi qinersisinnaasut 25 procentingajalluinnaannit taaguunneqaramik kinguariarput.
