Prinsessip kalaallisoortaani atorpai

Ilimmarfimmi ippassaq immikkut qaaqqusilluni katerisimaartitsinermi prinsesse Mariep kalaallisuuni atoqqaarpai. Taamatuttaaq prins Joachim ernerilu marluk prins Nikalai prins Felixilu aamma qaqortumaarput.

Mersortartut katillugit arfineq-pingasut Ilulissaneersut, Saqqameersut Narsameersullu kalaallisuuliornermut peqataapput.

Salomine Møller kalaallisuuliornissamut isumassarsisuuvoq.

- Prins Joachimip ukiut pingasut matuma siorna Ilulissaniinnerani isumassarsiara pinngorpoq. Taamanikkut prins Joachim prinsesse Marielu assammiortaaqqammerput. Taamattumik prins Joachim aperitippara ajorinnginneraa nuliassaa kalaallisuussaanik sanaanneqartuuppat. Ajorinngimmagulu kalaallisooq suliaralugu aallartipparput, Salomine Møller oqaluttuarpoq.

Taassuma mersortartut Ilulissaneersut, Saqqameersut Narsameersullu katersornissaat isumagaa suliaannillu ataqatigiissaarineq akisussaaffigalugu.

Kalaallisuut ukiut pingasut ingerlanerini mersorneqarput, atortuilu tamarmik immikkut sanaajupput, soorlu annoraaq aamma immikkut ikaartitigaasoq.

Prinsesse Mariep kalaallisuussani Ilulissani arfininngornermi katerisimaartoqarnerani tunissutisiaraa.