Putin aamma Biden Ukrainemik aaqqiagiinnginneq pillugu naapissinnaapput
Ruslandip præsidentia Vladimir Putin aamma USA-p præsidentia Joe Biden Ukrainemi aaqqiagiinnginneq pillugu ataatsimeqatigiinnissamik isumaqatigiikkallarput.
Taama nalunaaruteqartoqarpoq Frankrigip præsidentiata illussaarsuanit Elysee-miit ataasinngornermi ullaassakkut.
Frankrigipå præsidentiata sapaatiummat præsidentip taakku marluk oqaloqatigigamigit siunnersuuteqarpoq ataatsimiissasut.
Frankrigemi præsidentip illussaarsuanit nalunaaruteqartoqarneranut atatillugu ataatsimiinneq aatsaat pisinnaavoq, Rusland Ukrainemik tiguaassanngippat.
USA-mi præsidentip illorsuanit Det Hvide Hus-imit nalunaarutigineqarluni uppernarsarneqarpoq Joe Biden ataatsimeeqatigiinnissamut akuersilluni qujassuteqartoq.
Putin oqaaseqanngilaq
- Naalagaaffiup allanut attaveqarneranut piareersimajuaannarput. Ruslandip sorsunnissaq toqqarpagu, sukkasuunik imaannaanngitsunillu kinguneqartitsinissatsinnut piareersimavugut, amerikami præsidentip illorsuanit taama nalunaaruteqartoqarpoq.
AAMMA ATUARUK USA: Russit Ukrainemik tiguaariaannaapput
USA-mi præsidentip illorsuani oqaaseqartartoq Jen Psaki nalunaaruteqarnermut atatillugu ilanngullugu oqaatigaa, Rusland piffissami qanittumi Ukrainemut saassussinissamut suli piareersartoq
Taama nalunaaruteqartoqarneq pillugu Russit præsidentiata illorsuanit oqaaseqarfigineqanngilaq.
Qaqugu pinissaa ilisimaneqanngilaq
Putinip Bidenillu ataatsimiinissaat sioqqullugu taakkua oqaluuserissasaat, amerikamiut nunanut allanut tunngasunut ministerianit Antony Blinkenimit aamma Russit nunanut allanut tunngasunut ministerianit Sergej Lavrovimit sisamanngornermi februaarip ulluisa 24-ani ataasimiinermi piareersarneqassaaq.
Oqaluuserineqartussanut ilanngussiniarluni Frankrigip præsidentiat Emmanuel Macron oqarpoq.
USA-p præsidentia Joe Biden Ruslandillu præsidentia Putin qaqugu ataatsimiissanersut nalunaarutigineqanngilaq.
