Putinip atomimik qaartartorsuit amerlisarneqarnissaat aallutariniaraa
Ruslandip atomimik qaartartorsuarnik ikilisaasoqarnissaanut USA-mik isumaqatigiissuteqarnini pisortatigooortumik ullut marluk matuma siornatigut atorunnaarallartereeraalu Ruslandip præsidentia Vladimir Putin oqalugiaqqippoq, Ruslandillu atomimik qaartartorsuit amerlisarneqarnisssaat aallutariniaraa tassani oqaatigalugu.
- Nunami sakkutuut, sakkutuut timmisartortartut imarsiortullu atomimik qaartartorsuaateqarnerisa nukittorsarneqarnissaa aallutariniarparput, Putin ilaatigut oqarpoq.
Atomimik qaartartorsuarnik ikilisaasoqarnissaanut isumaqatigiissut Ruslandip USA-llu 2010-mi atsiorpaat, isumaqatigiissulli taanna Ruslandip tungaanit maanna atorunnaarallartinneqarluni. Tassa imaappoq, Rusland isumaqatigiissummit anivinngilaq, isumaqatigiissummullu siunissami immaqa uteqqissinnaassalluni.
Atomimik qaartartorsuit amerlisarneqarsinnaanissaannut eqqarsaat, Vladimir Putinip aatsaat saqqummiutilinngilaa.
USA-p præsidentiata Joe Bidenip Putinip oqalugiaataa qisuariaateqarfigaa, Putinillu atomimik qaartartorsuit atorlugit saassussinissaa ilimaginagu.
- Taama saassussisoqaraluarpat kukkunerussaaq annertooq. Akisussaanngitsuliornerussaaq. Atomimilli qaartartorsuarnik atuinissaa assigisaanilluunniit iliuuseqarnissaa oqalugiarnera tusarnaareerlugu ilimaginngilara, Joe Bidenip, ABC Newsimit pingasunngornermi unnukkut apersorneqarluni oqaatigaa.
Russit sakkutuuisa Ukrainemut isaanissaannut Vladimir Putinip naalakkiuteqarneranit aqagu tallimanngornermi ullaakkut ukioq ataasinngussaaq.
