Qaqortormiut utoqqatsernermut: Naalakkersuisut utoqqatsernissaat pisariaqanngilaq
Kalaaliaqqat 1951-imi misiliutitut Danmarkimukartitaasimasut pisortatigoortumik pingasunngormat utoqqatserfigineqarnerat aningaasanillu taarsiiffigineqarnerat ullumi naapitatta tamarmik pissusissamisoorsoraat. Nunatsinnili Naalakkersuisut tullinnguullutik utoqqatsernissamut pissutissaqanngitsut naapitagut aamma isumaqarput.
Danskit ministeriunerata Mette Frederiksen-ip kalaaliaqqat 1951-imi misiliutitut Danmarkimukartitaasimasut sinneruttuinut arfiniliusunut, Naalagaaffiup katersugaasivissuani pingasunngormat pisortatigoortumik utoqqatsernera, Qaqortormiut pissusissamisoorsoraat.
- Nuannaarutigaara una pissutigalugu kiisami utoqqatserfigineqaramik, imaallaat inuttanngui eqqissiallassapput, kisianni piffissaq kingulleq utoqqatserfigineqarnerat qinngarilaaqaara, Inuuteq Storch oqarpoq.
Danskit ministeriunerat Mette Frederiksenip utoqqatsernera naammannersoq taassuma akiuminaatsippaa.
- Taamani Naalakkersuinikkut suliallit oqaasissaqannginnermik, taamaattumik taannartaa nalunartippara akinissaa, apeqqutaatillugulu taakkua meeraallutik Qallunaat Nunaanukartitaanikut qanoq isumaqarnersut, Inuuteq Storch oqarpoq.
Meeraallutik misiliutigineqartut
Meeqqat 22-t 1951-imi misiliutaasussatut Kalaallit Nunaanniit Danmarkimut nassiunneqarput.
Meeqqat taakkua misileraanermi pingaarnertut inissisimapput, taamani meeqqat qallunaanngorsarneqarput maligassatut Kalaallit Nunaannut utersinnaaqqullugit.
Taakkuali angerlaramik kalaallisut oqalussinnaanngillat ilaquttaminnilu najugaqaqqusaanatik. Meeqqallu taamani Nuummi børnehjemmimi inissinneqarlutik.
Meeqqat 22-t sinneri arfinillit ullumi suli inuupput. Taakkua 80-it missaannik ukioqarput.
Naalagaaffiup meeqqanik Danmarkimut 1951-imi aallartitsilluni misileraateqarnermi suleqataasimaneranut ministeriuneq Mette Frederiksen pingasunngormat utoqqatserpoq. Meeqqat taakku Danmarkimit nunatsinnut uterunik meeqqanut allanut maligassiusunngornissaat siunertarineqaraluarpoq.
Ukiorli ataasiinnaasussaagaluartoq meeqqat kalaallit 22-t, piviusumik angajoqqaaminnit taamani peersinneqartut inuunerup sinnerani kingunerlutsitsinermik ujariatsinermillu nalaataqarput.
- Ajunngeqaaq taamak qallunaat nunaanniit utoqqatserfigineqarnerat ajunngeqaaq, aamma eqqarsaatigalugu taamanikkut pinngitsaalisaapput, neriorsorneqaraluarput angajoqqaaminnut utertinneqaqqissasut, kisiat taamaattoqarnikuunngilaq, Bibi Mølgaard oqarpoq.
Nunatsinnili naalakkersuisut utoqqatsissanersut taassuma apeqquserpaa.
- Sooq nunatsinniit utoqqatserfigineqassappat? Taamanikkut 1951-imi massakkut Naalakkersuisugut taamanikkulluunniit inunngorsimanngillat, taavalu aamma taamanikkut pissutsit imaapput nunarput qallunaat nunaannit qulangersimaneqarami. Kalaallit Nunaat oqartussaassuseqartitaasimanavianngilaq, taamanikkut qallunaat nunaata tamanna aaliangersimassavaa, Bibi Mølgaard.
Inatsisartut utoqqatsertariaqartut
Meeqqat misileraataasussat 22-t 1951-imi Danmarkimut aallartinneqartussanngormata nunarput akuerseqataavoq. Nunatsinnimi taamani landsrådemi ilaasortani 23-usuni 19-it akuerseqataapput
Misiliutaasimasuni 22-usuni sinneruttut arfiniliusut ilaat Helene Thiesen isumaqarpoq Naalakkersuisut siulittaasuat Mùte Bourup Egede tullinnguulluni utoqqatsertariaqartoq, tamannalu naapitatta Qaqortup aqquserngani naapitatta ilaata pissusissamisoorsoraa.
- Tassa isumaqarpunga utoqqatsernerat ajunngitsumik eqqortumik iliornerusoq, Mylius Gabrielsen oqarpoq.
- Taamanikkut amerlanerussuteqartut akuersipput una pissutigalugu Kalaallit Nunaanni qallunaanngorsaasoqarniassammat, kisianni tamanna allatut ajornartumik kukkussutaavoq, taamaattumik aamma kukkunerussaaq oqassaguma Inatsisartut utoqqatseqqullugit, Mylius Gabrielsen oqarpoq.
Pisortatigoortumik utoqqatserfigineqartut tamarmik immikkut 250.000 koruuninik taarsiiffigineqarput.
