Qasigiannguani atuarfiup pisortaa: Taama nalaataqarnikuunngilagut
Corona Qasigiannguani Juunarsip Atuarfiani ulluinnarnut allannguingaatsiarpoq.
Atuarfimmi atuartunit 130-nit ikinnerpaamik 31-t coronavirusimik tunillatsissimasut ippassaq paasineqarput.
Qasigiannguani tunillatsissimasut 50-it missaanniittut, nakorsaaneqarfik Sermitsiaq AG-mut ullumi paasissutissiivoq.
Tunillatsittullu amerliartornerat ernumassutigineqarpoq.
- Angajoqqaarpassuit pisumi immikkut ittumi toqqissisimannginnerat paasisinnaavara. Pissutsit aamma ilungersunarluinnarput. Taamaammat angajoaqqaat ernumallutik atuarianngiinnarsinnaanissaat akueraarput, Aqqa Samuelsen oqarpoq.
Zonikkaartumik angerlarsimaffimmiillu atuartitsinerit
Atuarfimmi klassit tamangajammik tunillatsissimasoqarfiunerat pissutigalugu atuartitsinerit zonekkaartunngortinneqarput, taamaalilluni atuartut atuariartortut taamaallaat atuaqatitit klassiminni naapittassavaat.
Tamatuma saniatigut atuartut angerlarsimasut ungasianiit atuartinneqarnissaat piareersarneqarpoq.
AAMMA ATUARUK Corona: Qasigiannguani meeqqat ikinnerpaamik 30-t tunillanneqarsimasut
- Assingusumik nalaataqarsimanngisaannarpugut, Aqqa Samuelsen oqarpoq, nangillunilu:
- Corona atuartut akornanni piffissami matumani sukkasuumik tuniluuppasippoq, tamannalu ernumanarpoq. Taamaammat tuniluunnermut pakkersimaariniarnissamut suliniutinik atulersitsivugut.
Misissuinerit akissutersineqangajalersut
Atuarfiup pisortaata ulluni tulliuttuni qanoq pisoqassanera pissangassutigaa.
- Suli misissuisoqarpoq, taamaammat qanoq ineriartortoqassanera pissangagingaatsiarparput.
Nunatsinni tunillatsissimasut amerlassusaat ulluni kingullerni saqqummiunneqanngillat.
Tamanna Nakorsaaneqarfiup Nuummi sapaatip akunnerani matumani qamittoortoqaqattaarneranik unammillernartorsiorneranik pissuteqarpoq.
Tunillatsissimasut amerlasussusaat KNR-ip paasiniarsaraa.
