Qeqertarsuaq tunualu 2022-mi takornarianit ornigarneqarnerpaasussat ilaattut CNN-imit toqqarneqarput

Qeqertarsuaq tunualu Italiami illoqarfik Napoli aamma USA-mi nuna allanngutsaaliugaq Yellowstone suna ataatsimoorussutigivaat?

Taakkuami USA-mi nutaarsiassaqartitsiviup CNN-ip ukioq 2022-mi takornarianut angalaarfissatut piukkunnarnerpaatut toqqarsimasaanni 23-usunut ilaapput.

Coronap tuniluunnerujussua pillugu angalanissat ajornakusoortinneqaraluartut, ukioq 2022-mi angalaarfissaqqinnerpaat allattorsimaffiliornissamut CNN tunuarsimaanngilaq

Qeqertarsuaq taamatullu Qeqertarsuup tunua nunanut allanut angalaarfissat ilaattut USA-mi nutaarsiassaqartitsivimmit CNN-imit toqqarneqarpoq.

- Arferit iluliarujusuit, sermit sukkasuumik iigartartut qimusserpassuillu, Qeqertarsuarmi tunuanilu takuneqarsinnaasut nutaarsiassaqartitsivimmi CNN-mi taama nassuiarneqarput.

AAMMA ATUARUK Amerikamiut aviisii marluk nunatsinnik sammisaqarput

Ilulissat kangia maluginiarneqarnepaavoq.

Nutaarsiassaqartitsiviup ilanngullugu allaaserivaa, takornariat angallammik Ilulissat kangianut angallanneqarsinnaasut, angalaarnerminnilu eqqarsaatigissagaat sooq Ilullissat Kangia silap pissusaata allanngoriartornerata qiterisaattut taanneqartarnersoq.

CNN-ip Ilulissani Kangiata Illorsuanik nuannarininni ersersippaa.

Takornarianit ornigarneqarluarsinnaasoq unnersiutigaat, tassani Kalaallit Nunaani inuit ukiut tuusintit sinnerlugit inuunerat paasisaqarfigineqarsinnaallutik.

Amerikamiut tusagassiorfiata aamma erseqqissaatigaa, Qeqertarsuarmi sissaq qernertunik sioralik Siorarsuit Ilulissanit angallammit tikinneqariaannaasoq.