Qeqertarsuarmi arpatitsineq, nipilersortut nerisassiornerlu ulluni pingasunik ingerlanneqalersut

Qeqertarsuarmi Festivaali ukiut tamaasa ingerlanneqartartoq kingumut tallimanngorpat tullianiit kateriffiusussanngorpoq.

- Aasakkut aaqqissuuttarparput, ukiakkut annerusumik tikinneqarsinnaaneq ajoratta. Tassa nuannaartitsinissaq inuttaasunut siunertaralugu. Illoqarfimmiuinnarnuunngitsoq, diskobugtimeersunik sinerissamiillumi allamit aamma peqataaniartunik tikittoqartarpoq.

Kommune Qeqertalimmi Timi Tarnimilu aqutsisoq, Felix Olrik taama oqarpoq.

Festivali juulip ulluisa arfineq pingajuanniit qulingannut ualikkut nipilersortoqarfiusassaaq, ullorlu ataaseq nerisassiorfiussalluni.

Festivalertoqarnerani Tulleriit, Suulut Thomassen, Uummatit kiisalu Siissisoq Knud Mathiassen peqatigalugu  nipilersortussaapput.

Georg Olsen Food Festivaalimik taallugu nunatta pissarititaanik arsaattarfimmi ullormi ataatsimi nerisassiortitsisassaaq.

Taavalu festivalip ullui marluk siulliit Qeqertarsuup qaqqaanut arpaffiusassapput. Ullullu pingajuanni nunamut arpassallutik.

Arpaqataasuni ajugaasut aningaasanik pinnattaassaqartinneqarput.

Festivaali ukiut tamaasa ingerlanneqartarpoq. Aamma ukiuni kingullerni.

Coronavirusi pissutigalugu ukiuni kingullerni unitsinneqartunut ilaanngilaq. Coronavirusi nunarsuarmi tuniluummat, nunatsinniittut nunanut allanut aallarnissamut periarfissaqarujussuanngillat. Tamannalu Qeqertarsuaq Festivalimik aaqqissuisut maluginiarpaat.

- Tassa siorna inoqarujussuartoq malunnarpoq, ukioq mannalu inoqarujussuassasoq neriuppugut. Inuit nunanut allanut siorna aallarsinnaanikuunngillat, maannakkullu aallagarput, inoqarujussuaqqissasorli neriuppugut, Felix Olrik oqarpoq.

Kommune Qeqertalik festivalimik aaqqissuisuuvoq.