Qeqertarsuup meeqqerivituaa terissanik ajornartorsiuteqartoq: Anaanasoq ernumasoq
Qeqertarsuarmi meeqqat påskep ulluini meeqqerivimminngereerlutik marlunngormat paaqqinnittarfimmukaramik naliginnaanngitsumik pisoqarpoq.
- Terissanik ulikkaarsimasoq meeqqerivik. Terissallu anaannik ulikkaartoq.
Meeqqerivimmiittartunut marlunnut anaanaasoq, Josefine Mølgaard, meeqqerivimmukaassinermini misigisani pillugu taama oqarpoq.
Kommune Qeqertalimmi aningaasaqarnermut pisortaasup, meeqqerivik teriaqartoq uppernarsarpaa:
- Soorunami taamaattussaanngilaq. Taamaattumik meeqqerivik eqqiarparput, siunissami terissaqarnissaa killilersimaarniarlugu, Nicolai Odgaard Jensen KNR-mut oqarpoq.
Meeqqat katersortarfimmi paarineqarallartut
Meeqqat 50-it missaanniittut Qeqertarsuup meeqqerivituaaniittarput. Taakkua meeqqeriviup eqqiarneqarnissaa pillugu marlunngormat ullormi ataatsimi katersortarfimmiipput. Pingasunngornermi meeqqerivimmut uterput. Eqqiaanerli ajunnginnerulersitsinngilaq.
KNR-ip paasissutissaatai naapertorlugit meeqqerivik marlunngornermi eqqiarneqareeraluartoq kiisartunik terissat aqqaneq-marluk marlunngornermit pingasunngornermut pisarineqarput. Teriaqarneralu meeqqanut kingunerluppoq.
- Soorunami meeqqat paasinarput meeqqaniippiarusukkunnaaqqasut. Unganeq ajortut ungallutik.
- Teriaqarnerartarpaat takusarsimagamik.
Anaanaasup meeqqat taamak misigisaqartalernerat toqqissisimanarinngilaa. Akisussaasunullu, tassa Kommune Qeqertalimmut, kissaateqarpoq.
- Kissaatigisorujussuugaluarpara allamut nuunneqarsinnaannginnersut meeqqat. Massakkut meeqqerivik tulluanngilaq meeqqanut sulisunullu.
Tamannalu piviusunngorsinnaavoq:
- Meeqqeriviup ajornartorsiutitut nalilerpagu, taava piffisami kingullermi pisutut meeqqat katersortarfimmut nuunneqarsinnaapput, Nicolai Odgaard Jensen KNR-mut taama oqarpoq.
Terissat illoqarfiat
Qeqertarsuarmi terissanik aatsaat ajornartorsiortoqanngilaq. Illoqarfiummi eqqaavissuani 2020-mi teriarpassuaqarpoq.
Terissanik taamani ajornartorsiortut tassaanerupput eqqaavissuarmut qanittumi najugallit. Tamaakkaluartoq terissat illoqarfiup sinneranut aamma siammarput.
AAMMA ATUARUK Qeqertarsuarmi teriarpassuaqarnera ajornartorsiutaasoq
Illoqarfimmi innuttaasut sunngiffimminni teriarniarniarlutik taamani eqqaavissualiaasarput. Taakkununnga Mark Møgaard akuuvoq. Taassuma terissanik ajornartorsiuteqarneq eqqaavissuup piffissami sivisuumi ikuallanneqarneq ajorneranik peqquteqartoq nalilerpaa. Terissammi eqqaavissuup ikumannginnerani eqqissillutik uumasarput.
