Qeqqata Kommunia Naalakkersuisunit nammineq misissuutinik pissarsinissaq utaqqisinnaanagu nammineq piniartoq
Naalakkersuisut nunatsinnilu kommunit tallimat isumaqatigiissusiorsimasut sapaatip akunnerata siuliani saqqummiunneqarpoq.
Kommunini sulisut ingerlaavartumik misissorsinnaanissaat pissutigalugu nammineq misissuutit 300.000-it kommuninut nassiunneqartussanngorput.
Qeqqata Kommuniatali misissuutit amerlanerungaatsiartut pisariaqartippai. Kommunimmi sulisuminnut misissuutissat 765-iinnaat pissarsiarai, naatsorsupallakkaannilu unammillernartua ersarippoq:
- 765-it amerlannginnamik, suliffeqarfiugatta 1300-nik sulisulik, taamaammat pingaarnersiueqqaarnikuuvugut, Qeqqata Kommuniani Atugarissaarnermut immikkoortortaqarfimmi pisortaq, Nick Berthelsen oqarpoq.
- Immikkullu aamma inniminniinikuulluta peqarniassagatta sulisut tamakkerlugit testertuarsinnaanissaat pissutigalugu.
Naalakkersuisunit misissuutit qanoq amerlatigisut kommunip pissariarissanerai Nick Berthelsenip suli ilisimanngilaa.
- Kommuninut ataasiakkaanut qassiussanersut suli tigusaqarnikuunngilagut, aamma taakku utaqqigallarpagut, Nick Berthelsen oqarpoq.
AAMMA ATUARUK Kommunit nammineq misissuutinik akeqanngitsunik tunniussuisinnaanngiinnartut
Qeqqata Kommuniali utaqqiinnarusunngilaq. Taamaammat kommune misissuutinik 6000-inik nammineerluni pisivoq, sulisut taamaalillutik sulinerminni toqqissisimasinnaassallutik.
Coronap tuniluunnerani kommune isumannaallisaanermut allanik aamma suliniuteqarpoq, sulisut taamaalillutik innuttaasunut kiffartuussiinnarsinnaassallutik.
- Sullissineq allatut inissikkallarparput inuttaa naapinngikkaluarlugu, telefonikkut skypekkkulluunniit teamsikkulluunniit naapittalernikuuvagut innuttaasut, Nick Berthelsen oqarpoq.
”Innuttaasunut akissaatikitsunut” misissuutit pillugit kukkuluttorneq
Misissuutit 300.000-it kommuninut neriorsuutigineqartut sapaatip akunnerata siuliani oqallisaangaatsiarput.
Naalakkersuisummi coronamut killiffik pillugu tusagassiortunik katersortitsinerminni innuttaasunut sukkasuumik misissuutersinissamut akissaqanngitsunut kommunimit tunniussuisoqarumaartoq neriorsuutigaat.
Naalakkersuisut sapaatip akunnerata siuliani tallimanngornermi ualikkut tusagassiuutinut nalunaarummi allapput:
”…kommunit nalunaarutigivaat misissuutinik pisinissamut akissaqannginnerusunut agguaasseqataarusunnatik. Taamaattumik Naalakkersuisut allatut iliuuseqarniarlutik periarfissanik ujartuipput. Anguniagarli tassaavoqq innuttaasut tamarmik nammineq misissorsinnaanissaat, akissakilliornerlu aniffiussanngitsoq.”
AAMMA ATUARUK Sukkasuumik misissuutinut kukkuluttorneq: Naalakkersuisut oqaaseqanngilluinnarnerat illuatungiliuttut quarsaarutigaat
Kisianni ataasinngorneq ulloq 17. januaari tusagassiortunik katersortitsinermi isumaginninnermut sulisoqarnermullu Naalakkersuisoq, Mimi Karlsen, sukkasuumik misissuutit atorneqarnerat pillugu ima oqarpoq:
- Nakorsaaneq oqarpoq antigentestimik imaluunniit PCR-testimik misissortinnissaq pingaaruteqarunnaartoq. Massakkorpiaq imaappoq covid-19-imut ersiuteqaraanni imaluunnit napparsimasutut misigigaani misissortinnissaq pisariaqarunnaartoq.
Tamannali kommunit tungaanniit itigartitsissutigineqarpoq. Nick Berthelsenip Naalakkersuisunit pisortatigoortumik nalunaaruteqartoqarnissaa suli utaqqivaa.
- Kommuni tusagaqarnikuunngilaq toqqaannartumik, tusagassiutitigut aamma uagut tusagaqaannarnikuuvugut.
- Massakkut utaqqigallaannarpugut qanoq (peqqissutsimut aqq.) naalakkersuisoqarfimminngaanniit taakkua kikkuussanersut, suussanersut, kommuninullu isumaqatigiissuteqarniarnersut aamma utaqqiinnarpagut, atugarissaarnermut immikkoortortaqarfimmi pisortaq oqarpoq.
