Qinigassanngortittut allattorsimaffiat ilaannakortoq kommunimi saqqummiunneqarsimasoq
Tapiliussat: Folketingimut qinigassanngortittut pisortatigoortumik allattorsimaffiat naalagaaffiup sinniisoqarfianit Kommuneqarfik Sermersuumut kingusinaarluni apuunneqarsimasoq, siusinnerusukkut allapparput. Tamanna kukkunerummat naqqipparput. Kukkunerput ajuusaarutigaarput.
Innuttaasut eqqummaarissut ilaat Folketingimut qinigassanngortittut allattorsimaffiat Facebookimi quppernerminut ataasinngormat ikkuppaa, qinigassanngortittullu aqqi tallimat tassani amigaataallutik. Qinigassanngortittut allattorsimaffiat allakkatigut taasisinnaanissamut atatillugu kommunip allattoqarfianiittoq, innuttaasup assimik ikkussisup oqaatigaa.
Qinigassanngortittut allattorsimaffiat aviisip Sermitsiap saqqummersissisimasaa kommunimi sulisumit ataasinngormat naqitanngortinneqarsimasoq, Kommuneqarfik Sermersuup attaveqaqatigiinnermut akisussaasuata Lars Damkjærip oqaatigaa:
- Folketingimut qinigassanngortittut pisortatigoortumik allattorsimaffiat naalagaaffiup sinniisoqarfianit kingusinaarluni apuunneqarsimavoq. Qinigassanngortittut allattorsimaffiat Sermitsiameersoq naqitanngorlugu sullissiviup nerrivianut ilineqarsimavoq, taannalu sullissinermi atorneqarsimalluni. Allattorsimaffilli pisortatigoortuusimanngilaq, allattorsimaffillu pisortatigoortup piffissaq eqqorlugu saqqummersinneqarsimannginnera soorunami ajuusaarutigaarput, Lars Damkjær, Kommuneqarfik Sermersuup attaveqaqatigiinnermut akisussaasua KNR-imut oqarpoq.
Qassit allattorfimaffimmik ilaannakortumik takusaqarsimanersut nalunarpoq
Qinigassanngortittut allattorsimaffiat tamakkiisoq Kommuneqarfik Sermersuumut novembarip 21-ani, tassa qinigassanngortinniarluni ullormi nalunaarfissami kingullermi apuunneqartoq, naalagaaffiup sinniisoqarfia KNR-imut ilisimatitsivoq.
Tassa qinigassanngortittut allattorsimaffiannik ilaannakortumi saqqummiussineq kommunimi kukkuluttornermik peqquteqarpoq.
Tassa qinigassanngortittut allattorsimaffiat immikkoortortaqarfinnut attuumassuteqartunut ingerlateqqinneqarsimanngitsoq, Lars Damkjær ilisimatitsivoq.
Qinigassanngortittut allattorsimaffiata kommunip allattoqarfiani immikkoortortami kukkusumik ingerlatinneqarsimasoq Lars Damkjærip oqaatigaa, allattorsimaffimmillu nivinngaasussat allattorsimaffik pisimanagu. Kukkunerup akunnerup ataatsip ingerlanerani iluarsineqarnera taassuma oqaluttuaraa:
- Innuttaasut piffissami tassani iluamik sullinneqarsinnaasimanngillat, tamannalu ajuusaarutigaarput, pisorli iluarsiivigineqapallappoq, Lars Damkjær oqarpoq.
Inuit qanoq amerlatigisut qinigassanngortittut allattorsimaffiannik ilaannakortumik takusaqarsimanersut oqaatigisinnaannginnerarpaa.
