RAL umiarsuarmik igalaanik usisumik immikkut Tasiilamukartitsissasoq
Tasiilami septembarip ulluisa 24-anni piterangaatsiarpoq.
Illut qalii igalaallu sequtserneqarput. Kommunip inissiaatileqatigiiffia, Iserit aqqutigalugu inissiaannarni igalaat 120-nit 130-nut amerlassuseqartut taarserneqartariaqarput. Tasiilamilu igalaat sillimmataasut taama amerlatiginngillat.
Taamaammat umiarsuarmik sanaartornermi atortorissaarutinik useqartumik immikkut pisariaqartitsisoqarpoq. Tasiilamiillu qinnutigineqartut maanna tusarneqarput.
Royal Arctic Linemi umiarsuarmik assartuummik immikkut decembarimi tikisitsiniartoq, RAL nittartakkamini paasissutissiivoq.
Tamanna ”aserorterneqarsimasut aaqqissornissaanut ilaatigut igalaanik allanillu sanaartornermi atortunik pisariaqartunik pilersuinissamik qulakkeeriniarnerusoq”, RAL nalunaaruteqarpoq.
Tamannalu Kommuneqarfik Sermersuup inissiaatileqatigiiffiata Iseritsip Tasiilami immikkoortortaani teknikeqarnermut pisortap Michael Waaentzip nuannaarutigalugulu oqiliallaatigeqaa.
- Assut oqiliallannarpoq. Igalaassallu tikinniariarpata igalaanik piaartumik taarsersuilissaagut. Igalaat piteqqamit aserukkat taartissaasa saniatigut piteraqqinnissaanut igalaassamaatinik aamma qinuvugut.
Michael Waaentz oqarpoq nangillunilu:
- Igalaat 100-t missaanniittut taarsigassaapput. Pissamaatissagut aamma decembarimi ilaassammata piteraqqinnissaanut pissaqalissaagut. Piteqqap novembarimi 2020-mi igalaajagai taamaalilluta aamma taarsersorsinnaalissavagut. Michael Waaentz oqarpoq.
Ukioriartulersoq
Umiarsuaq assartuutaasoq kingulleq novembarip tallimaata missaani tikittussaagaluarpoq. Umiarsuarmili tassani piterarneranit ajoquserneqartunut tamanut aaqqissuinissamut atortussat ilaanissaat qulakkeeqqanngilaq.
Taamaammat Kommuneqarfik Sermersuumi borgmesterip tulliata, Justus Hansenip (Demokraatit) Tasiilamilu najugaqartup Royal Arctic Line attaveqarfigaa. Kommunip Tasiilami immikkoortortami pisortaa, Hjørdis Viberg aamma taamaaliorpoq.
AAMMA ATUARUK Op til 130 vinduer skal skiftes i Tasiilaq efter piteraq
Kommunip illut sapaatip akunnerata siuliani nutaanik igalaalersorlugit aallartippai. Inuit angerlarsimaffii nutaanik, ningusuunik igalaalersorneqassapput, taakkulu ujaqqanit allanillu eqqorneqarsinnaasuussallutik. Ukiungajalerpoq arlaleriarlunilu piteraqqittussaassallunilu.
Aqqusinermi qulliit uppittut
Tasiilami septembarip 24-ata 25-atalu akornanni piterarpoq. Anorip sakkortunerpaanerani tassa sekundimut 50 meterinik sakkortussuseqarnerani angallatit anorimit teqqaasinneqarput. Illoqarfiup aqquserngini qulliit uppipput innaallagiaarullunilu. Igalaat sioqqanit ujaqqanillu teqqaasunik aserorterneqarput.
Inuit 47-t unnuap ingerlanerani qimagussortinneqarput, qujanartumillu ajoqusertoqarani. Tasiilamili najugaqartorpassuit maanna igalaaqaratillu illui qaleqanngillat. KNR-ip ilaqutariit taama nalaataqartut pulaarpai. Illumi inuit katillugit aqqanillit najugaqarput, illup qalia tingissimavoq, illullu qaliani putorujussuaqalerluni.
Illu maanna ulissimavoq.
- Taamannak ukiiffugissagutsigu atorsinnaanngilaq. Ukiukkummi piterakkajuttaqaaq, piteqqippammi nalunngilara arlaatigut ammaqqissasoq putoqqissasorlu. Taanna ilungersunaqaaq, Ulrikke Ertaq KNR-imut sapaatip akunnerata siuliani oqarpoq.
