Republikanerit Repræsentanternes Husimi amerlanerussuteqalertut
Republikanerit, USA-mi inatsisartunut assigiinngitsunut marlunnut sapaatit-akunnerata siuliani qinersisoqareersorlu inatsisartut aappaanni Innuttaasut sinnerlugit sinniisoqarfimmi, tassa Repræsentanternes Husimi amerlanerussuteqalerput.
Repræsentanternes Husimi amerlanerussuteqarniaraanni ikinnerpaamik 218-inik ilaasortaatitaqartoqartariaqassaaq, Republikanerillu tamanna ippassaq unnukkut qulakkeerpaat.
Demokratit taassuma saniatigut inatsisartut aappaanni senatimi amerlanerussuteqarnertik sapaatit-akunnerata siuliani qulakkeerpaat.
Republikanerit Repræsentanternes Husimi amerlanerussuteqalernerisigut USA-mi kongressimi ukiuni tulliuttuni marlunni avissaartuuttoqalernissaatut isikkoqarpoq.
Inatsit nutaaq akuersissutigineqassappat Repræsentanternes Husimi akuersissutigineqaqqaassaaq, senatimilu kingorna aamma akuersissutigineqassalluni.
AAMMA ATUARUK Demokratit USA-mi inatsisartunut qinersinermi ilimagisamit angusarissaanerusut
Republikanerit sinnerlugit Repræsentanternes Husimi ilaasortaq, Kevin McCarthy, Repræsentanternes Husimi siulittaasussatut republikanerinit innersuunneqarpoq. Republikanerit iluminni taasititsinermi taama aalajangerput.
Republikanerit Repræsentanternes Husimi amerlanerussuteqalernertik atorlugu USA-mi naalakkersuisut Kinamut attaveqarniarnerisa immikkut ittumik ukkatarineqalernissaa anguniarpaat. Nutaarsiassaqartitsivik Reuters taama allaaserisaqarpoq.
USA-p Ukrainemik ikiorsiisarnerata nakkutigineqarnerulernissaa republikanerit aamma kissaatigaat. Ukrainemiulli Ruslandimit sorsunneranni ikiorsiisarnerup unitsinneqarnissaa republikanerit pilersaarutiginngilaat.
Repræsentanternes Husimi ilaasortat katillugit 435-upput. Ilaasortat ukiut allortarlugit qinerneqartarput, naalagaaffiillu ataasiakkaat inuttussusaat aallaavigalugit agguataarneqartarlutik.
