Restaurant Nordlysimi attartortoq aqqanileriarluni akiliisinnaajunnaarsimasoq atorunnaarsinneqarsimasunillu suliaqarsimasoq

Nuummi neriniartarfik Restaurant Nordlys novembarip aqqarngani ullormiit ullormut matuvoq.

Nordbo A/S-imi piginneqataasoq Allan Bo Jensen naapertorlugu neriniartarfimmi attartortumik Søren Nielsenimik suleqateqarunnaarnermik tunngaveqarpoq.

Pineqartullu akornanni isumaqatigiinngitsoqarsimasoq nassuiaatigineqarpoq.

Hotel Nordbomik piginnittoq Allan Bo Jensen pisoq pillugu oqaaseqarusunngikkallarnerarpoq. Hotel Nordbolli aamma Søren Nielsenip isumaqatigiinnginnerat eqqartuussivilersuussinermik kinguneqarsinnaasoq Allan Bo Jensenip paasissutissiissutigaa.

Akiliisinnaajunnaarnerit arlallit

Søren Nielsen Restaurant Nordlysimi aprilimi 2022-mi attartortunngorpoq. Taanna ukiorpassuarni suliffeqarfinnik assigiinngitsunik aallarnisaasutut misilittagaqarpoq.

Suliffeqarfiilli aallarnisartarsimasai ingerlalluartuaannarsimanngitsut CVR-ilinnut nalunaarsuiffimmi takuneqarsinnaavoq.

Søren Nielsenip suliffeqarfiutigisaani 17-iusuni aqqanillit akiliisinnaajunaarsimapput atorunnaasitsinerillu nalunaarutigineqarsimallutik. Kingullermik 2018-mi taama pisoqarpoq.

Suliffeqarfiit sanaartornermut aamma siunnersuinermut, nujaleriffimmut, aningaasaliinernut, naqiterivimmik aamma atugassanik pisiniarfimmut ilaatigut tunngassuteqarput.

Suliffeqarfiit sisamat suli ingerlapput, takkununnga ilaalluni Nordlys Gruppen ApS, taassuma ataaniilluni Restaurant Nordlys aamma suliffeqarfiit marluk atorunnaarsimasut pissutaanilli nassuiaateqarfiunngitsut.

KNR-ip Søren Nielsen itisiliinerusumik apersorniaraluarpaa, arlaleriarluni saaffiginninnerit iluatsinngillat.

Søren Nielsen Restaurant Nordlysimi attartortuujunnaaraluartoq, Hotel Nordbomi neriniartarfik siunissami suli ingerlaannaassasoq Allan Bo Jensenip Sermitsiaq.AG-mut paasissutissiissutigaa.