Neriniartarfiutilik coronamut malittarisassat pillugit: Millioninik arlariinnik annaasaqassaagut

Jullilernerani nereqatigiinnerit, ataatsimuualaarnerit aaqqissuussallu allat. Neriniartarfinnut ataatsimuualaartarfinnullu ukiukkut ulaarpaarfiunerpaasartoq coronamut killilersuisoqarneranit eqqungaavoq.

Naak illoqarfiit pingaarnersaanni neriniartarfiit sutorniartarfiillu juullilernerani nerisaqatigiittoqarnissaanut, nipilersortoqarnissaanut juullerpaluttumillu pinnersaasiortoqarnissaanut pareeraluartut isertussat amigaataapput: Illummi iluani (silamilu) tamat ornitaanni inuit amerlanerpaamik 20-t isersimasinnaanissaat Naalakkersuisut killiliuppaat.

Naalakkersuisut killilersuinerat sapaatit akunnerni marlunni sivisussuseqartoq neriniartarfinnut akunnittarfinnullu millioninik arlariinnik naleqassasoq, neriniartarfimmik akunnittarfimmilu pisortaq naliliivoq.

Taakku kaaviiaartitaqarnissaannut isertussat apeqqutaapput. Taamaammat inunnut 20-nut ammatitsinissaq akilersinnaanngilaq.

Assi © : KNR

Laarseeraq Chemnitz på den midlertidigt lukkede restaurant Killut. Foto: KNR

- 20-nik isersimasoqarsinnaanitsinnit kaaviaartissinnaasavut qaammammut illumut akiliutigisartakka naligaat. Akissarsiassanutt taavalu igaassanut, innaallagiamut assigisaannullu akiligissat minillugit.

- Taamaammat annaasaqarnissarput minnerpaammiitinniarlugu matoqqavugut. Sulisugut akunnermusiaqartuupput. Taakkualu sipaarfigisinnaavagut. neriniartarfimmik Killumik imerniartarfimmillu Daddysimik pigittoq, Laarseeraq Chemnitz oqarpoq.

Tallimanngormat malittarisassiarineqartut akunnerit arfineq-pingasut qaangiuttut atuutilersut

Corona pillugu malittarisassat coronap Nuummi sapaatini akunnerni arlalinni tuniluutereernerata kingorna tallimanngormat atuutilersinneqarput. Illoqarfiit pingaarnersaanni tunillatsissimasut aatsaat taama amerlatigipput. Tallimanngormamit ullumikkumut illoqarfiit pingaarnersaanni tunillatsissimasut nutaat 48-t paasineqarput.

Taamaammat katerinnissamut killilersuineq Naalakkersuisunit atulerseqqinneqarpoq. Tamanna tallimanngormat nalunaaqutaq sisamanut tusagassiortunik katersortitsisoqarnerani pivoq, malittarisassallu akunnerit arfineq-pingasut qaangiuttut unnuap qeqqanit atuutilersinneqarput.

AAMMA ATUARUK Corona pillugu malittarisassat paatsuungassutigaagit? Aaku ataatsimut isigalugit

Naak inuit 20-t amerlanerpaamik katerissinnaaneranut killilersuineq ulluni 14-iinnarni atuuttussaagaluartoq tamanna neriniartarfinnut akisussaqisoq. Laarseeraq Chemnitz oqarpoq.

- Missingersuipallakkaanni ullunut 14-inut millionit aappaat avillugu annaasaqaatigissavarput, Laarseeraq Chemnitz oqarpoq.

Neriniartarfinnut 100-t missaanni neriartortoqarsinnaasunut killilersuutit aamma akisupput. Hotel Hans Egedemi pisortaaneq, Jørgen S Bay-Kastrup oqarpoq.

Pilersaarusiorluarnerusoqarli

Neriniartarfik Sarfalik aamma A Hereford Beefstouw sapaatini akunnerni marlunni ammassaaq - taamaakkaluartorli annaasaqangaatsiassallutik, pisortaq naliliivoq.

- Killilersuisoqannginnerani killilersuinernillu saqqummiinnginnermi tamanna piffissamut ungasinnerusumut qanoq kinguneqassanersoq eqqarsaatigilluarneqaqqaassaaq.

- Ulluni 14-ini 2 millionit koruunit missaannik annaasaqassalluta ilimagaarput. Neriniartarfiinnaq, taavalu jullilernerani nereqatigiinnerit marluk uani pivagut, Jørgen S Bay-Kastrup oqarpoq.

- Ullut 14-it qaangiuppata susoqassanersoq ullumikkorpiaq naluarput. Julefrokostertitsissaagut? Ataatsimiinnerit taamaatiinnassavagut? Piffissaliisarnerat sivikippallaarujussuarpoq, pisortaq oqarpoq, Naalakkersuisullu innersuussutigalugit.

Jørgen S. Bay-Kastrupip Naalakkersuisut siusissumik nalunaaruteqartarnissaannik kaammattorpai.

Taassuma neriniartarfinni sooq inuit amerlanerpaamik 20-oqqusaallutik - pisiniarfinnili killileqannginnera paasiuminaatsippaa.

KNR-ip peqqinnissamut naalakkersuisoq, Kirsten Fencker (Naleraq) oqaaseqartinniarsarigaluarpaa. Tamannali ilanngutassiap saqqummersinnissaanut periarfissaasimanani.

Nuummi malittarisassat nutaat uku atuupput. Taakkulu novembarip ulluisa 26-at ilanngullugu atuutissapput:

• Nuummiut bussini, taxani, ininilu tamanit ornigarneqarsinnaasuni qanermut assiaquteqartariaqaqqilerput. Tassa imaappoq pisiniarfinni, atuakkanik atorniartarfinni, sutorniartarfinni, neriniartarfinni, imerniartarfinni, katersugaasivinni allani atorneqaqqusaalerput. Tamanna meeqqanut aqqaneq-marluk ataallugit ukioqartunut atuutinngilaq.
• Qanoq amerlatigisut katerissinnaaneranut aamma kililiisoqaqqippoq. Inuit amerlanerpaamik 20-t illut iluani katerissinnaatitaapput. Tamanna pisiniarfinnut atuutinngilaq.
• Inuit amerlanerpaamik 20-t silami aamma katerissinnaatitaapput.
• Tamanna ilinniarfeqarfinnut, atuarfinnut, ulluunerani paaqqinniffinnut politikkikkullu katersuunnernut atuutinngilaq.
• Angerlarsimaffinnili piumasaq malillugu katerissinnaavusi.

Nuummiit nunatsinni sumiiffinnut allanut angallanneq aamma sukateriffigienqarpoq. Tamanna aamma Danmarkimukarniarlutik Kangerlussuarmut aqqusaaginnarnissannut atuuppoq. Malittarisassaq taanna sisamanngorpamit atuutilissaaq.

• Nuummiit nunatsinnut sumiiffinnut angalaniaruit tamakkiisumik akiuussuserneqarsimassaatit. Tamanna aamma Kangerlussuarmut aqqusaaginnarniaraluarit atuutissaaq.
• Nassatanik tunniussiartorninni akunnernik sivisunerpaamik 48-nik pisoqaassuseqartumik PCR-imik misissortinneq imaluunniit sukkasuumik misissortinnermik, tunillatsissimannginnernik uppernarsaataasumik takutitsisinnaassaatit. 
• PCR-mik misissortinnermik, tunillatsissimannginnermik takutitsinissaq sisamanngorpamit atuutilissaaq. Matumani peqqinnissaqarfimmi piffissami matumani teknikkikkut ajornartorsiuteqarneq, coronamik tunillatsissimannginnermik piffissami eqqortumi uppernarsaateqarnissamik qulakkeerinnissinnaannginneq pissutaavoq. 
• Taamaammat sisamanngorpat tungaanut Nuummiit nunatsinni sumiiffinnut allanut angalaniaruit coronapas "taamaallaat" takutittariaqarpat.