Neriniartarfinnukartut coronapasip takutittariaarunnera nuannaarutigaat
Tallimanngormat nunami tamarmi coronapasi piumasaqaataajunnaarpoq, kingunerisaanillu bar-it, neriniartarfiit, filmertarfiit assigisaasalu isertumik coronapas-inik takutitsinissat piumasarisarunnaassagaat.
Isertut taanna pillugu qanoq isumaqarpat?
Inge Møllerip assorsuaq nuannaarutigaa neriniartarfinni coronapasi takutittarunnaassagamiuk.
Nunatsinni killilersuutit – Naatsumik
- Nunatsinni tamarmi tamanit iserfigineqarsinnaasuni coronapas februarup 4-ni atuukkunnaarpoq.
- Ukununnga isissaguit qanermut assiaquteqassaatit: Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu). Bussinut taxanullu ilaanermi.
- Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
- Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
- Iluaqaaq, siuliani Pascuttimiillunga sivittajaamik issiareersunga sulisoq aggerpoq coronapasseralu takujumallugu, mamiatsallunga akivara sooq qangali takujumasimannginneraa, maannakkut pissutsit taamaariataarsinnaaneri pisariaaruppoq, iluaqaarlu, qanermut assiaqut isernitsinni taamaallaat atuinnassavarput, Inge Møller Johnsen KNR-mut oqarpoq.
Aamma Louise Jeremiassenip nammineq kapitissimanngitsup tamanit iserfigineqarsinnaasunut siornatigut coronapasimik piumasaaqateqartunut isersinnaanngornini iluaraa:
- Tunillanneqarsimasut taamak amerlatigisut qangalili taamaalisimassagaluaramik aamma kapitinneqanngitsuusugut ingasattumik mianersulertaratta, Louise Jeremiassen oqarpoq, nangipporlu:
- Soorunami iluaallannarpoq uagut kapitinneqanngitsuusugut aamma kiffaanngissuseqartussaagatta, imannak misiginarpoq: kiisami aniguivugut.
Putsi Mathiasen assinganik isumaqarpoq :
- Qutsassivunga kapitinneqanngitsunut kiisami allanut aamma isersinnaanngorput, iluaqaaq angalanermi, neriniartarfinniluunniit coronapassimik takutitsseqqittariaaruppugut, Putsi Mathiassen oqarpoq.
KNR-ip illoqarfiit pingaarnersaanni naapitaanni tamani coronapasip atorunnaarnera iluarineqarpoq.
