Rishi Sunak Tuluit Nunaanni ministeriuninngussasoq
Rishi Sunak Tuluit Nunaanni ministeriunertut pisortatigoortumik ullumi marlunngorneermi ivertinneqassaaq.
Ministeriunerup Downing Streetimi allattoqarfia taama ilisimatitsisoq, nutaarsiassaqartitsivik AFP allappoq.
Aningaasaqarnermut ministeriusimasoq 42-nik ukiulik konservatiivit siulittaasuattut ippassaq ataasinngornermi toqqarneqarpoq, kunngi Charlesimullu ullumi marlunngornermi oqaloqatiginnikkiartuutigaluni pisortatigoortumik ministeriuninngussaaq.
Sunakip Liz Truss ministeriunertut kingoraassavaa. Truss ministeriunertut sapaatit-akunnerata siuliani tunuarpoq, qaammatip aappaata qeqqa ministeriunerulluni.
AAMMA ATUARUK Boris Johnson siulittaasunngorniarunnaartoq: Periarfissarissaaraluarpunga
Tuluit Nunaanni ministeriuninngornissaa paasinarsimmat, Sunak tamanut pisortatigoortumik siullerpaamik oqalugiarpoq.
- Inatsisartuni suleqatinnit tapersersorneqarlunga konservatiivit siulittaasuattut toqqarneqarnera maniguullunga qujassutigaara, Rishi Sunak oqarpoq.
Konservatiivit ataatsimuulerseqqinnissaat Sunakip suliassaasa annerit ilagaat. Konservatiivit inatsisartuni amerlanerussuteqarput, sammisaqarfiilli assigiinngitsut pillugit partiip iluani avissaartuuttoqarluni. Brexit, nunassissinnaasut aningaasarsiornerlu pillugit partiip iluani ilaatigut isumaqatigiinngittoqarpoq.
Tuluit Nunaata aningaasarsiornera taassuma saniatigut ingerlanerliorpoq, Sunakilu tamanna pillugu unammilligassaqangaatsiarluni.
