Russit 200.000-t Ukrainemi sorsunnissamut piareersimatinneqalertut
Ruslandimi sakkutuut Ukrainemi sorsunnermut piareersimatinneqartussat amerlineqarnissaat præsident Vladimir Putinip sapaatit akunnerisa marluk matuma siornatigut nalunaarutigereeraalu, russit 200.000-nit amerlanerusut sorsunnissamut piareersimatinneqalerput.
Ruslandip illersornissamut ministeria Sergei Sjojgu taama oqarpoq.
Russit 300.000-t Ukrainemi sorsunnissamut piareersimatinneqarnissaat anguniagaasoq, Ruslandimi naalakkersuisut siusinnerusukkut nalunaarutiginikuuaat.
AAMMA ATUARUK Russit Ukrainemi sorsukkiartortinneqarnissartik pinngitsoortinniarsarigaat
Sakkutuut Ukrainemi sorsunnissamut piareersimatinneqarniartut sungiusartarfinni 80-ini sungiusarneqartut sakkutuutullu piareersimanissamut sungiusartarfinni arfinilinni allani sungiusarneqartut, illersornissamut ministereqarfiup ilisimatitsissutigaa.
Sakkutuut piareersimatinneqarnissaannut nalunaarut illuatungilerniarlugu inuit tuusintilikkaat Ruslandimi akerliussutsimik takutitsipput. Russillu tuusintilikkaat sorsunnissamut piareersimatinneqarnissartik pinngitsoortinniarlugu nunanut Ruslandimut killeqarfilinnut qimaasimasut nunat pineqartut taassuma saniatigut aamma nalunaarutiginikuuaat.
