Rusland: USA-p ataatsimeeqatiginissaanut assamik isaassissanngilagut

USA Ruslandilu sinnerlugit Ukraine pillugu isumaqatigiinniartussat Schweizimi Genevemi ullumi ataasinngornermi ataatsimiilerpata annerusumik angusaqarnissaq USA-p nunanut allanut tunngasunut ministeriata Antony Blinkenip naatsorsuutiginngilaa.

Ruslandip Ukrainemik saassussilluni Ukrainemik tiguaanissaa USA-p Europamilu iligisaasa ernummatigaat.

- Sapaatit-akunnerata tulliuttup ingerlanerani angusaqarnissarput naatsorsuutiginngilara. Isumaqatigiinniutissanik saqqummiussaqarsinnaassaagut. Russit aamma taamaaliorumaarput, taava isumaqatigiinniarnissamut tunngavissaqassanersoq takujumaarparput, Antony Bkinken TV-qarfimmut CNN-imut oqarpoq.

AAMMA ATUARUK Rusland-ip Kalaallit Nunaat saaffigigaa – aalisarneq pillugu suleqatiserinnittut

Ruslandip nunanut allanut tunngasunut ministeriata tullersortaata Sergej Rjabkovip Rusland sinnerlugu isumaqatigiinniartuunissani, Ruslandimi nutaarsiassaqartitsivimmut RIA Novostimut sapaammi oqaatigaa, naapeqatigiissinnaassuseqarsinnaanissanili naatsorsuutiginngilaa, piumasaqaatinilli ersarissunik nassarluni ataatsimiigiassanerarluni.

Ruslandimi naalakkersuisut isumaqatigiinniutissatut siunnersuutit USA-mut siusinnerusukkut saqqummiunnikuusaat taassuma innersuussutigai.

Siunnersuutilli akornanni immikkuualuttut USA-mit isumaqatigineqanngilluinnartut USA-p præsidentiata Joe Bidenip oqaatigereerpaa.

Rusland Ukrainemik saassussissagaluarpat USA EU-lu Ruslandimut immikkut ittumik sukannersumillu iliuuseqarnissamut piareersimapput, Ruslandip assersuutigalugu nunat tamalaat aningaaserivilerinermut pissutsinut peqataasinnaannginnissaa siunniunneqarluni.

/ritzau/dpa