Ruslandip ISS 2024-mi suleqataaffigiunnaarniaraa

Avataarsuani 400 kilometerisut ungasitsigisumi nunat tamalaat avataarsualeriffiani ISS-imik taaguuteqartumi russit suleqataaffigiunnaarlugu aappaaguagu 2024-mi qimattussanngorpaat.

Taama russit avataarsualiartitsiveqarfianni Roscosmos-imi pisortanngortoq, Jurij Borisov, præsidentiminnik Vladimir Putinimik oqaloqateqartilluni taama oqarsimasutut nutaarsiassaqartitsivimmit Ritzauimit issuarneqarpoq.

- Isumaqarpunga uagut russit nammineq pigisatsinnik avataarsualiartaatiliornisatsinnut piffissanngortoq, Jurij Borisov oqarpoq.

- Ajunngilaq, russit præsidentiat Vladimir Putin akivoq.

Taakku taama oqartut, Ruslandip præsidentiata allaffeqarfiata takussutissiaani allaqqavoq.

Ukiut 24-t matuma siornagut 1998-imi amerikamiut russillu suleqatigiillutik avataarsuani nunat tamalaat avataarsualeriffeqarnissaq pilersippaat. Taamanerniillu taannaavoq amerikamiut russillu suleqatigiissutituaasa ikittuinaasut ilaat.

AAMMA ATUARUK Kina silaannarsualiartitsivoq rumstationimik inaarsaajartortussanik

Russilli Ukrainemut maanna sorsunnertik pissutigalugu nunarpassuarnit amerikamiunillumi amerlasuutigut mattussaapput.

Avataarsuani suliffeqarfimmi ISS-imi russit suleqataagallaramik USA, Canada, Europa Japanilu suleqatigivaat. Russilli suleqatigiinnermit tassannga aninialernerat sioqqulluguli ISS-p pisoqalisup 2024-mi atorunnaarnissaa aamma pilersaarutaareerpoq, ISS-ilu 2028-p tungaanut atorallaannarsinnaassasoq amerikamiut avataarsualiartitseqatigiiffiata NASA-p nalunaarutigaa.

Avataarsuani stationeqarfiup ISS-ip ukioq 2000-imiilli inunnit najorneqarluni sullivigineqartalersup nunarsuarput ullup unnuallu ingerlaneranni 16-eriarluni kaajallartarpaa, nunarsuarmiillu avataarsualiartaammik ISS-liartitsisarnerit akunnernik arfinilinnik sivisussuseqartarput.

Qallunaaq avataarsualiartartoq, Andreas Mogensen, danskini siullersaalluni 2015-imi avataarsualiartaammut ilaalluni ISS-mukaqataavoq. Taassumalu aappaagu aasakkut ISS-mukaqataaqqissamaalernera upernassaq marsimi saqqummiunneqarpoq.

Andreas Mogensen ISS-imi sulinermini ilisimatusarnernut assigiinngitsunut suleqataasarpoq stationeqarfimmillu aserfallatsaaleeqataasarluni.