Russit Ukrainemi atomimik nukissiorfik matunialersaaraat

Ukrainemi atomimik nukissiorfik Zaporizizja ukrainemiut sakkutuuinit qaartartunik saassunneqaannassaappat matuneqassasoq, russit illersornissamut ministereqarfiannit oqarput.

Ukrainemiut sakkutuui nukissiorfimmut saassusisarnerannik pisuutitsineq, ukrainemiut aqutsisuisa ilumuunginnerarpaat.

Atomimik nukissiorfimmik saassussisoqartarnerannik russit ukrainemiullu imminnut pisuuteqattaapput.

Inuit pilersitaannik atomimik nukissiorfimmi Zaporizjzjami ajunaarnersuaqartoqarsinnaanera russit aarlerissaarutigaat.

AAMMA ATUARUK Zelenskyj nutaamik atomimik ajunaarnersuaqarsinnaaneranik mianersoqqusivoq

Atomimik nukissiorfiup oqqassaarutigineqarnissaanut Ukraine pilersaarusiorsimasutut russinit pisuutinneqarpoq, naalagaaffiit Peqatigiit qullersaata António Guterrep tikeraarneranut atatillugu.

Nukissiorfik akersuuffiup eqqaanniittoq sapaatit akunnerini kingullerni saassussiffiusarpoq.

Nukissiorfik taanna Europami atomimik nukissiorfiit annersaraat.

Nalaagaaffiit Peqatigiit qullersaata Ukraine maanna sorsuffiusoq ullumi sisamanngornermi aqagulu tallimanngornermi tikeraassavaa.