McDonaldsip Ruslandimi nerilunniartarfiutigisimasai ammaqqilertut

McDonaldsip Ruslandimi nerilunniartarfiutigisimasai 850-it qaammatit marluk ingerlaneranni ammaqqinneqassapput.

Allattoq Ritzau

juunip 08-at 2022 10:57

Nutserisoq Mads Lynge

Ruslandip sakkutuui Ukrainemut ukioq manna februaarimi isaariitsiartullu nerilunniartarfiutillip McDonald's-ip Ruslandimi nerilunniartarfiutini 850-it matuai, russilli nerilunniartarfinnik "kingornussisuusut# nerilunniartarfiit siulliit 15-it maannna ammaqqinnialerpai.

Russit Ukrainemik saassusseqqammiinnartullu amerikamiut nerilunniartarfiata McDonald's-ip Ruslandimit aniniarnini nalunaarutigaa.

McDonald's ukiuni 30-ni Ruslandimeereerluni tassa anivoq.

McDonalds'-ip Ruslandimi nerilunniartarfiutini 850-it, katillugit 62.000-inik sulisullit, marsip aallartisimalaarneraniilli matoqqatikkallarsimavai.

AAMMA ATUARUK McDonaldsip Ruslandimi nerilunniartarfiutini tuninialersaarai

Nerilunniartarfiilli Ruslandimi suliffeqarfiutilimmut kingorna tunineqarput. Nerilunniartarfiit qaammatit marluk ingerlaneranni ammaqqinneqarumaartut pisisup nalunaarutigaa, nerilunniartarfiillu 1000-nut amerlineqassasut aamma oqaatigalugu.

Amerikamiut nerilunniartarfiutaata taanna burgerinik pomfritinillu sassaalliisartutut ilisimaneqartoq suliffeqarfiit Ruslandimik tunussisut amerlasuut akornanniippoq.

Ruslandimmi Ukrainemik saassussinera akerliuffiginiarlugu suliffeqarfissuit allat amerlasuut Ruslandimit aninertik nalunaarutigaat.

Oqorutinik ilaatigut nioqqutilik Jysk, immiortorlu Carlsberg taakkununnga ilaapput.

Nutaarsiassami kukkunermik nassaarsimaguit uunga allaffigineqarsinnaavugut.