Russit aallartitaat Ukrainemi isumaqatigiinniaqqinnissaminnut piareeqqapput
Russit aallartitaat Ukrainemik eqqisseqatigiinissaq anguniarlugu isumaqatigiinniarneq nangissallugu piareeqqapput, ilutigalugulu Ruslandip nuna sanilertik ullut arfineq aappassaanni sakkutuuleqqagaa
- Aallartitavut isumaqatigiinniarnermik nangitsissallutik piareeqqapput, Kremlip oqaaseqartartua Dmitrij Peskov oqarpoq. Kreml ilaatigut Rusalndip præsidentiata najugaqarfigaa. Oqaaseqartartup naatsorsuutigaa aallartitat pingasunngornermi unnukkut naapissasut. AFP taama allappoq.
Ataasinngormat sorsunneq pillugu Ukraine Ruslandilu naapipput. Illuatungeriit isumaqatigiipput isumaqatigiinniaqqinniarlutik.
- Isumaqatigiinniarnerit ingerlaavartuutinniarlugit isumaqatigiippugut, ataatsimiinnerup siulliup kingorna Ukrainemiut isumaqatigiinniartartuat Mykhailo Podoljak oqarpoq.
Russit naalakkersuisui naapertorlugit Ruslandip præsidentia Vladimir Putin ataasinngormat oqarpoq Ukrainep siuttui "nazistiujunnaartinnagit" aamma "sakkutuuerutitinnagit" aaqqiisoqarnavianngitsoq.
Taamaattumik isumaqatigiinniarnikkut aaqqiisoqarnissaa suli ungasissorujussoorpasippoq.
Russit sakkutuuisa Ukraine illoqarfiilu annerit saassuttuarsinnarpaat.
Ilaatigut avannamut knagimut illoqarfissuaq milliuunit sinnerlugit inulik Kharkiv sakkortuumik eqqugaavoq.
Pingasunngornermi russit sakkutuui illoqarfiit pingaarnersaannut Kiev-imut qanilleriarujussuarsimapput.
