Kyivimi imeqaqqilerlunilu innaallagiaqaqqilertoq

Russit missilinik saassusseqattaareerneranni imeerullunilu innaallagiaarutereersorlu Kyivimi maanna imeqaqqilerlunilu innaallagiaqaqqilertoq, Ukrainemi illoqarfiit pingaarnersaata borgmesteria ilisimatitsivoq.

Kyivimi inissiani 250.000 missaannittut russit missilinik saassussereerneranni ippassaq ataasinngornermi unnukkut innaallagiaarupput, taakkunanngalu 40 procentit missaat imermik aamma pilersorneerussimalerlutik.

Tassa imermik pilersorneerussimalersut imeqaqqilereernerani ikilipput, taakkumi ippassaq ataasinngornermi ullaap tungaani 80 procentit missiliorsimagaluarmatigit.

AAMMA ATUARUK Ruslandip Ukrainemi nukissiuuteqarfiit ilaat saassukkai

Russit missilinik Kyivimi saassussinermik saniatigut Ukrainep avannarpasissortaani, kangisissortaani qiterpasissuanilu aamma saassussipput.

Missilit 50-init ikinnerunngitsut Ukrainemi sumiiffinnut assigiinngitsunut ippassaq ataasinngornermi ullaap tungaani igeriunneqarsimasut, Ukrainep præsidentiata allaffeqarfianit ilisimatitsipput.

Rusland missilinik Ukrainemi sapaatit akunnerini kingullialuni saassussisaqattaaraluttuinnarpoq.

Russit isumannaallisaanermi kiffartuussisuisa, FSB-kkut, ukrainemiut Krimimi ikaartarfissuarmi qaartartumeerisuunerareeraallu russit saassussisaqattaaleraluttuinnarput.