Franskit atuagassiaat profiitip muuamaap titartarneqarneranik imaqartumik saqquummersitseqqinnialertoq

Franskit atuagassiaat quiasarutiginninnermik imaqartartoq, Charlie Hedbo, profiitip muuamaap titartarneqarneranik imaqartumik saqquummersitseqqinnialerpoq. Nutaarsiassaqartitsivik AFP taama allappoq.

Saqqummersitseqqiineq atuagassiami sulisunut 2015-mi januaarimi saassussimasutut unnerluutigineqartut 14-it eqqartuussinerup aallartinnerani pissaaq.

AAMMA ATUARUK Aviisi Charlie Hebdo saqqummersinneqaqqilersoq

Eqqartuussineq Frankrigimi illoqarfiit pingaaarnersaanni Parisimi pingasunngorpat aallartissaaq.

Atuagassiami Charlie Hedbomi sulisut saassunneqarmata inuit aqqaneq marluk toqutaapput, taakkununnga ilaallutik Frankrigemi quisaarutinik allattartut titartaasartullu ataqqineqarnerpaat ilaat.

Profiitip Muuamaap titartarneqarnerata atugassiamit saqqummiunneqarnerata aporaassutaanera pissutigalugu Frankrigimi avissaartuunneqarpoq.

Inuit 14-it eqqartuunneqarnissaat coronap nunarsuaq tamakkerlugu tunillaassuunnerata ajornartoortitsinera peqqutigalugu qaammatini arlalinni kinguartinneqaqattaarpoq. Eqqartuussinerli pingasunngorpat aallartissaaq. Tamannalu novemberip ulluisa qulingata tungaanut pissasoq ilimagineqarpoq.

AAMMA ATUARUK Kalaaleq Parisimiittoq: Atuagassiaq quiassuaatiginnittartoq Charlie Hebdo pilerngunneqartoq

Peqqarniisaarnianik Frankrigimi eqqartuussisoqarnerani aatsaavissuaq filmiliortoqassaaq. Inuit eqqartuussinermut malinnaarusuttut amerlammata taamaaliortoqassaaq.

Unnerluutigineqartut 14-iusut amerlanersaat peqqarniisaarnianut attuumassuteqarsorineqarput. Unnerluutigineqartut ukiut 20-t tikillugit parnaarussassanngortillugit pineqatinneqarsinnaapput.

Pisiniarfimmi Charlie Hebdomilu saassussisoqarnerani annattut eqqartuussinermi uppernarsaasuussapput.